RUS
Бүгінде оқиғаның мән жайы тексеріліп жатыр. Ал құқық бұзушылық орын алған мешіт имамы жағдайдың қалай болғанын айтып берді. Бұл туралы otyrar.kz хабарлады.
Шымкентте өзге мәзһабта намаз оқыған ер адам соққыға жығылды. Оқиға қаладағы Абдуссаттар Сманов мешітінде орын алған. Видеодан мешітте намаз оқып жатқан жамағатты көруге болады. Бір сәтте ер адам күтпеген жерден қасында тұрған азаматты ұрып құлатып, аяғымен тепкілей бастайды. Құқық бұзушылық орын алған мешіт имамы бұл оқиғаның мән жайын түсіндірді.
Берік Шотабеков, Абдуссаттар Сманов мешітінің имамы: «Өзге өңірден келген 10-15 шақты азаматқа намаз алдында имам бірнеше рет ескерту жасаған. Бізде ҚМДБ бойынша, ішкі тәртіп бойынша бүкіл Қазақстан аумағында Ханафи мәзһабында «әминді» іштен айтылады деп ескертілді. Және де осы ескертуге құлақ аспастан бірнеше рет намазды бұзуға, имамның жұмысына кедергі жасаған азаматқа шыдай алмаған жамағатымыз оны қатты эмоцияға беріліп, қол жұмсап жіберді»
Бүгінде оқиғаның мән жайын полиция тексеріп жатыр. Белгілі болғандай бұл жағдай 12 мамыр күні кешкі 19:00 шамасында орын алған.
Шымкент қаласы ПД баспасөз қызметі: «Оқиға қатысушылары полицияға арызданды. Тағайындалған сараптамалардың нәтижесімен процессуалды шешім қабылданады»
Қазақстан мұсылмандары діни басқармасы мешітке келуші жамағатты мешіт ережесіне бағынуға, сонымен қатар құлшылық үйінде сабыр сақтап, көркем мінез танытуға шақырады. Ескерте кетсек, бекітілген «Мешіт ережесі» бойынша Қазақстан мұсылмандарының ауызбіршілігі мен біртұтастығын қамтамасыз ету үшін еліміздегі намаз бен діни рәсімдер Әбу Ханифа мәзһабы бойынша орындалады.