RUS
SMARTNEWS.KZ басылымының хабарлауынша, «Человек в маске» атымен танымал бетперде таққан құпия жігіт тағы бір отбасыны қуантты.
Ол бұл жолы жертөледе тұратын Кәусардың науқас сіңілісіне қаржылай көмек көрсетіп, оларға жаңа баспана сыйлады.
«Менің атым Кәусар. Жасым 12–де. Сіңілім бар, диагнозы эпилепсия, талмасы ұстап қалады. Әлі жүрмейді. Ал анам ет дүкенінде еден жуушы болып жұмыс жасайды. Кейде темір тапсырады», – дейді кішкентай Кәусар өз сөзінде.
Кәусардың айтуынша, олардың тұратын жеріне нашақорлар кіріп келген сәттер болған.
«Біз жертөледе тұрамыз. Бұнда көп қиындықтар болады. Кейде ішіп алған адамдар, кейде нашақорлар кіріп кетеді. Ыстық судың құбырлары атылып кетеді, мұнда тарақандар бар», – дейді ол.
Кішкентай Кәусар осы уақытқа дейін Құдайдан үміт үзбегенін айтты.
«Мен түсінемін анама қалай қиын екенін. Бірақ қолымнан ештеңе келмейді.
Анам намаз оқып, Алладан көмек сұрайды. Бізді Алла Тағала тастамайтынына сенеміз», – деді қаршадай қыз.
Тығырыққа тірелген отбасыға бетперделі жігіт жаңа баспана сыйлады. Сондай-ақ Кәусардың сіңілісіне ем-дом жасатпақ.
«Бүгін сол себептен біз осындамыз. Жақында сенің сіңілің емделуге барады. Және сендер баспаналы болдыңдар», – деді бетперде таққан жігіт.
Желі қолданушылары «Человек в маске» қорына алғысын жаудырып, кішкентай Кәусардың қайсарлығына тәнті болды.