Шала туған балалар арасында туа бітті көз ауруы анықталып жатыр

Ақтөбе облысында жыл сайын 20 мыңға жуық сәби өмірге келеді. Оның 450-ге жуығы айы-күні жетпей, түрлі тексеруден өтеді. Дәл осы балалардың 20% жуығына ретинопатия диагнозы қойылады. Қазіргі кезде көз жанарындағы тамырлардың орналасуы, көз қабықтарының дұрыс жетілуі мен ондағы түрлі ауруды анықтауға арналған ретиналды камера көпшілікке қолжетімді бола түсті. 

- Бұл ауруды ерте анықтап, ем жүргізбесе бала өмір бойы соқыр болып қалуы мүмкін. Қазір осы санатқа кіретін балаларға скрининг жасап, ауруды ерте анықтап жатырмыз. Кейін перинаталдық орталықта ота жасалады. Бұрынғыдай Алматы мен Астанаға барудың қажеті жоқ. Жаңа аппаратты қолдану кезінде дәрігер ғана емес, баланың анасы да бар жағдайды экраннан көре алады. Емнен кейінгі жағдайды да көруге болады. Жалпы 2021 және 2022 жылдары Ayala қоры офтальмологиялық лазер мен тікелей емес офтальмоскоп берді. Бұл құрылғы арқылы мыңнан астам балаға диагностика жасалды,- деді Ақтөбе перинаталдық орталығы директорының орынбасары Толқын Серғазина.

Ақтөбе перинаталды орталығындағы офтальмолог дәрігер Кәмшат Мешітбаева шақалақтардың көз ауруын анықтау, емдеуге бейімделіп, қазір түрлі ота да жасап жүр. 

- Бұл аурудың өз сатылары болады. Жаңа аппарат арқылы қай сатыда екенін бірден білуге болады. Біз тексеріп болған соң қосымша ем жүргіземіз немесе отаға дайындаймыз. Мұны өзім ғана емес, ата-анасы да көріп, шешім қабылдай алады. Мұндай аурулар көбіне айы-күні жетпей өмірге келген балада анықталады. Себебі олардың дене мүшесі толық жетілмейді, кейде түрлі инфекция жұқтырып өмірге келеді,- деді офтальмолог дәрігер Кәмшат Мешітбаева.