Бетперде таққан жігіт тағы бір мұқтаж отбасыны қуантты (ВИДЕО)

SMARTNEWS.KZ басылымының хабарлауынша, «Человек в маске» атымен танымал бетперде таққан құпия жігіт өмірдің сынағына өздері адал жолмен төтеп беріп келе жатқан тағы бір отбасыны қуантты.

Кезекті отбасының отағасы Мұрат пен оның әйелі екеуі де бірінші топтағы мүгедек жандар. Олардың кішкентай егіз қыздары бар, әрі өздері жалдамалы үйде тұрады.

«Такси боламын, машинаны жалға алып жүрмін. Өзім бірінші топтағы мүгедекпін. Өз аяғыммен жүре алмаймын. Әйелім де бірінші топтағы мүгедек. Оның көзі көрмейді. Үйде отырып Брайлев әліпбиі арқылы Құран оқиды. Өзіміз пәтер жалдап тұрамыз», – дейді Мұрат.

Бетперделі жігіттің «Жаратушыдан не сұрайсыз?» деген сауалына  ол былай деп жауап берді:

«Балаларым жақсы, тәрбиелі болғанын сұраймын. Біз бәріне көніп келе жатырмыз ғой. Ал балаларымыз қиналмаса екен», – деп көзіне жас алды Мұрат.

Бетперделі жігіт Мұрат пен оның әйелін емделуге жіберді. Сондай–ақ кіші Қажылыққа жолдама беріп, су жаңа көлік пен пәтерді де қатар сыйға тартты. Бетперделі жұмбақ жігіттің осыншама жақсылығын естіген Мұрат қуаныштан еріксіз жылап қалды.