RUS
SMARTNEWS.KZ басылымының хабарлауынша, облыс әкімі жергілікті бюджет және демеушілік есебінен қарастырылып отырған қаржының 38,8 млрд теңгесі зардап шеккен тұрғын үйлерді жөндеп, қалпына келтіруге жұмсалып жатқанын айтқан.
Облыстық мәслихаттың кезекті он төртінші сессиясындағы әкімнің баяндамасына сәйкес, бүгінгі таңда су басқан 4 мың үйдің үш мыңға жуығы жөнделген. Ал апатты деп танылған үйлердің орнына жаңа 511 баспана бой көтеріп жатырған көрінеді. Облыс басшысы қалған 503 отбасыға пәтерлер сатып алынатынын, ал тұруға жарамды тұрғын үйлер жөнделіп жатқанын алға тартты. Қазіргі уақытта 406 отбасы жаңа қоныстарына көшкен.
«Мемлекет басшысының тапсырмасы бойынша су тасқыны салдарынан зардап шеккен тұрғын үйлер мен инфрақұрылымды қалпына келтіру бойынша жедел жұмыстар басталды. Жергілікті бюджеттен және демеушілік есебінен 66,2 млрд теңге қарастырылды. Тұрғын үйлерден басқа материалдық залал өтемақысын 3,5 мыңға отбасыға өтеу үшін жергілікті бюджеттен 1,2 млрд теңге бөлінді. Сонымен қатар, 4,5 мыңға жуық отбасыға 369 мың теңге құрайтын біржолғы төлемдер берілді», - деді Асхат Шахаров өз сөзінде.
Сондай-ақ, қарғын су ауыл шаруашылығының өкілдеріне, шағын және орта бизнеске шығын әкелген. Сол үшін 4,5 мыңға жуық мал шығынын өтеу үшін бюджеттен 1,1 млрд теңге бөлінген. Ал зардап шеккен 76 кәсіпкерлік субъектісіне көрсетілген көмектің нақты сомасы аймақтық комиссия шешімінен соң, белгілі болады. Ал инфрақұрылымға 26 млрд теңге бөлінген.
Облыс әкімі тасқын салдарымен күрес жұмыстары әлі де қарқынды түрде жалғаса беретінін тілге тиек етіп, қиын сәтте шыдамдылық танытып, қолдау көрсеткен әрбір тұрғынға алғысын білдірді.