SMARTNEWS.KZ басылымының хабарлауынша, Қазақстан Ұлттық Олимпиада комитетінің президенті Геннадий Головкин жазғы Олимпиада ойындары өтетін Франция астанасы Парижге барды.
Қазақстандық гимнаст Милад Карими Instagram желісіндегі ресми парақшасында Париждегі Олимпиада қалашығында жүрген видеосын жариялады. Оның жанында Ұлттық Олимпиада комитетінің президенті Геннадий Головкин де бар.
"Әңгімең бар ма? Осындай қолдаумен біз кез келгенін жеңеміз", - деді Милад Карими.
Айта кетейік, Милад Карими биылғы жазғы Олимпиада ойындарында спорттық гимнастиканың 7 түрінен сынға түседі.
Ал Париж Олимпиадасы 26 шілде мен 11 тамыз аралығында өтеді. Төрт жылдықтың басты додасында 32 спорт түрінен 329 медаль жиынтығы сарапқа салынады. Байрақты бәсекеде Қазақстан намысын 80 спортшы қорғайды. Олар спорттың 25 түрінен бақ сынайды. Қазақстан Тәуелсіздік алғалы бері осымен сегізінші мәрте жазғы Олимпиадаға қатыспақ.