SMARTNEWS.KZ басылымының хабарлауынша, Парижге аттанған қазақстандық боксшылардың бірі Назым Қызайбай Олимпиада қалашығындағы бөлмесін көрсетті.
Назым Қызайбай Париждегі бөлмесін видеоға түсіріп, TikTok желісіндегі ресми парақшасына жариялады.
«Бұл мен жататын бөлме. Ең кішкентай, тар бөлме екен. Төсектер картоннан жасалған. Жаныма тағы бір спортшы келіп тұрады. Қазіргі таңда жалғыз тұрып жатырмын. Әзірге орналасып, жаттығуымызды жалғастырып жатырмыз. 25 шілдеде жеребе болады. Дұғада болыңыздар», - деді боксшы.
Назымның бейнежазбасы көпшілікке таралып, жанкүйерлер оған тыңғылықты дайындалып, алтын алуына тілектестік білдірді.
«Телефонды өшіріп тасташы олимпиада біткенге дейін», «Қайтесің сыйлықты? Жұмысқа кіріс, таста телефонды. Сәттілік, сен чемпион болуға келдің», «Екі дүркін әлем чемпионы және көптеген халықаралық жарыстардың жеңімпазы, Қазақ елінің мақтанышы Назым қыз Сізге енді Олимп шыңын бағындыруды тілеймін. Алла жар болсын!!!», «Жеңіспен оралуыңы тілектеспін... Қазақстанның көк туын Париж төрінде желбірет», - деді оқырмандар.
Назым Қызайбай маусымда Бангкокта (Таиланд) өткен бокстан соңғы лицензиялық турнирде Олимпиада жолдамасын жеңіп алған еді. Ол Париж бәсекесінде 50 кг салмақ дәрежесінде жұдырықтасады. Назымнан бөлек, әйелдер боксынан ел намысын Валентина Хальзова (75 кг) мен Карина Ибрагимова (57 кг) қорғайды.
Еске салайық, Ұлттық Олимпиадалық комитеттің президенті Геннадий Головкин Париждегі Олимпиада қалашағында бокстан Қазақстан құрамасымен кездескенін жазған едік.