RUS
SMARTNEWS.KZ басылымының хабарлауынша, Омбудсмендер институты «Қазақстан студенттерінің Альянсы» Республикалық студенттік қозғалысының Төрағасы, республикалық студенттік Омбудсмен Ұлан Наукен мен Алматы қаласы бойынша өңірлік студенттік Омбудсмен Әділхан Төлепберген Қазақ ұлттық аграрлық зерттеу университетінің және Сәтбаев Университетінің жатақханаларына мониторинг жүргізді.
Студенттердің алаңсыз оқып, жақсы маман болып шығуы үшін материалдық-техникалық базаның мықтылығы маңызды рөл атқарады. Мониторинг барысында университетке қарасты студенттік жатақханалардың жаңа оқу жылына дайындығы және тұрғын бөлмелерді бөлу критерийлері мен тұрмыстық жағдайларымен танысты. Білім алушылар үшін жасалған әлеуметтік қолдаулар, атап айтқанда, оқу-дайындық залдары, компьютерлік сыныптар, мәдени іс-шаралар өткізуге арналған Акт залы, медициналық кабинет, ас дайындау бөлмесі, кір жуу бөлмесі, тазалық және жатын орындар назарға алынды. Омбудсмендер студенттерге қажетті жиһаздар, тоңазытқыштар, кір жуғыш машиналары мен ас әзірлеу плиталарының техникалық жағдайына аса мән берді.
Мониторинг барысында тексерушілер жазғы каникулда «Жасыл Ел» жастар еңбек жасағы құрамында жұмыс істеп, жатақханада тұрып жатқан білім алушылармен сұқбат жүргізді, жағдайларымен танысты. Жатақханаларда жастардың бос уақытында қосымша ізденіп, мәдени, спорттық шаралармен айналысуына толық жағдай жасалынған.
Тексеру барысында ас бөлмелеріндегі үстелдердің техникалық қауіпсіздік ережелеріне сәйкес отқа төзімді материалдан болуы қажет екендігі, ас бөлмеде өрт сөндіру құралдарының арнайы орында ілінуі тиістігі ескертілді.
Қазіргі таңда ҚазҰАЗУ және Сәтбаев универсеті базасындағы жатақханалардың жаңа оқу жылына дайындығы тұрақты назарда тұр.