RUS
SMARTNEWS.KZ басылымының хабарлауынша, Франция астанасы Париж қаласында өтіп жатқан Олимпиада ойындарында Лондон Олимпиадасының чемпионы Серік Сәпиев парижге қазақ боксшыларын арнайы қолдауға келгенін айтты. Бұл туралы Kazinform жазды.
«Мен Парижге қазақ боксшыларына қолау көрсетуге келдім. Өкінішке қарай, бүгін Назым Қызайбай жартылай финалда қытайлық қарсыласына жол беріп, қола жүлдені қанағат тұтты. Әрине, өкінішті. Ол негізі алтын алатын қыз еді. Қолынан келгенінің барлығын жасады. Менің ойымша ол тактикалық жағынан жеңіліп қалды деп ойлаймын. Қарсыласы да оңай шағыла қалатын жаңғақ емес еді ғой. Ұтып кетті», — деді Серік Сәпиев.
Сонымен қатар Олимпиада чемпионы бар үміт Нұрбек Оралбайда қалғанын баса атап өтті.
«Ендігі үміт — Нұрбек Оралбайда. Бүкіл халық Нұрбекке сенім артып отыр. Ол украиналық боксшысымен чемпиондық атақты сарапқа салады. Нұрбектің қарсыласы физикалық тұрғыдан өте мықты боксшы. Ол Олимпиаданың күміс жүлдегері болған. Сондықтан, Нұрбекке ешқандай босаңсуға, қателік жасауға болмайды. Ол екеуі осыған дейін бір рет кездескен. Нұрбек бұл жолы қалай жұдырықтасу керектігін жақсы білуі керек деп ойлаймын. Өз басым, Нұрбекке де, жеке бапкеріне де финалда не істеу керектігі жөнінде ақыл-кеңесімді айттым. Украиналық боксшы көп жағдайда алдыға ұмтыла береді, ал Нұрбек бұндай кезде күтіп алып, тұрып берсе болғаны. Алтын біздікі деп ойлаймын», — деді Сәпиев.