«Бала кезден армандадым»: Баян Алагөзова қызының есімін не үшін Алиса деп қойғанын айтты

Сәби аңсап жүріп 50 жасында үшінші рет ана атанған Баян Алагөзова қызының есімін не үшін Алиса деп қойғанын әңгімелеп берді. Айтуынша, ол Алиса есімін бала кезінде кітаптан көрген.

«Қызымды неліктен Алиса деп атағанымызды айтқым келеді. Осыған байланысты сұрақ көп екен. Бұрын 3-4 сынып оқып жүргенімде «Алиса – ғажайыптар елінде» деген мультфильм көрдім. Сол ертегінің тарихы маған қатты ұнап, кейін кітабын сатып алып оқыдым. Сол кезде кіп-кішкентай қыз бола тұра «Болашақта қыз тусам атын Алиса деп қоямын» деп ойлаған едім», - дейді ол.

Ол салт бойынша балаға ата-әжесі есім қоюын қаламағанын айтты. 

«Бірақ бірінші қызым дүниеге келгенде қазақтың салты бойынша атын қоюға бізге мүмкіндік берілмеді. Бірінші баланың атын ата-әжесі қояды деген салттың қайдан шыққанын мен түсінбеймін. Солай Айсәуле деген атты қойды. 

Сосын Айару дүниеге келгенде Алиса деп атағым келген. Бірақ бұл жолы менің ата-анам қарсы болды. Ешкім мені қолдамады. «Немене мынау, қазақтың аты емес, қайдағы Алиса?!» деп ата-анам сөйлеген соң үн-түнсіз қоя салдым», - дейді ол.

Айтуынша, бұл есімді анасы ұнатпай қойған. Бірақ Алиса деп қызына қоюды көп жылдар армандап, ақыры 50 жасында туған үшінші қызына қойғанын айтты.

«Қазір де Алиса деген ат менің мамама ұнамайды. Бірақ мен енді баяғыдай жас емеспін, жасым 50-де. Енді өз қызыма қалаған есімді бере алатын жастамын.

Тұрсынға осыдан 8 жыл бұрын «Егер біздің қызымыз дүниеге келсе атын Алиса деп қояйықшы» деп айтып қойғам. Сондықтан қызымыз дүниеге келгенде басқа ат іздемедік те. Бәрі мен қалағандай болды», - дейді тағы да ана атанған Алагөзова.