«Қара жамылғандарға қарсымын»: Нұрлан имам теріс ағым өкілдерін сынады

SMARTNEWS.KZ басылымының хабарлауынша, дін өкілі Qasqa Jol бағдарламасында берген сұхбат беріп, ұлттық рухты көтеру үшін күш жұмсауға шақырды.

“Қазақ ілеспе халықпыз. Еріп кете береміз. Әсіресе қиналған сәтте біреу бізге келіп, бағыт-бағдар берсе, соның айтқанымен жүріп кетеміз. Ата-бабаларымыздың күнделікті өмірі диалектімізге, сүйегімізге сіңіп кеткен. "Әліпті таяқ деп танымайды" деген сөз де солардан келген. Бұл біздің болмыс. Араб болып кеткен жоқ. Киімімен, шекпенімен, елді-жерді сақтап қалды. Ұлтқа, елге деген махаббат бір жерге жиналып тұрды. Дін руханияттанып тұрды. Бұрылып, арабты сүй деген жоқ. Қазір кейбір жастар арабтардың қолын, аяғын сүйіп жүр. Еліңді сүй, жеріңді сүй, даланың жусанын сүй, сол артығырақ", – деп күйінді имам. 

Сондай-ақ дін маманы қоғамда белең алып жатқан әйелдердің қара түсті киіміне шүйлікті. 

“Білесіз бе, ТМД елдерінің ішінде біздің мемлекет ғана қыз-келіншектерге орамалмен төлқұжатқа түсуге рұқсат берген. Бұл Конститутциялық құқығын еркін қорғаған мемлекет деген сөз. Біздің елде қара киінгендерді жүргізбек түгілі, құшақтап жатқызса да қабылдамаймыз. Мен өзім Қазақстанның азаматы ретінде қабылдамаймын. Қара киінуге қарсымын. Біз зайырлы мемлекетпіз, біз Ислам мемлекеті емеспіз", – деп сынады Нұрлан Байжігітұлы.