Аяғы жүрмей, жағы қозғалмай қалды: 10 жыл тұрмыстық зорлыққа шыдаған қазақстандық әйел күйеуі жазасыз қала ма деп қорқады

“Үнемі көлікпен проблемасы бітпейді. Бір күні жол апатын жасап, 4 көлікпен соқтығысты да, 1 миллион қарызға кірді. Үйге келіп, бар ашуын менен алды. Осындай жағдайға тап болғанына мені кінәлап, жаздық үйге кіргізіп алып, ұрды. Қайын әпкем мен апа көмектесе алмай, сыртта есікті түртіп тұрды. Мені соққыға жығып жатқанын қыздарым да естіп, сыртта шырылдап жылап тұрды. Бірақ олардың “қой” дегеніне қарамай, ұруын жалғастырды”, – деді 27 жастағы келіншек. 

Айтуынша, осыдан кейін әйелдің аяғы баспай, жағы қозғалмай, бет-аузы, мұрны қанап дереу ауруханаға жеткізілген. Бірақ күйеуі ауруханадағыларға “құлап қалды” деп айтқан, ал әйел сол мезетте жағы қозғалмағасын тіл қатпапты. Алайда құрбысынан көмек сұрап, жазып үлгерген. 

“Жағым ауырып, 4 күн нәр татпадым. Дәретханаға адамдардың көмегімен барып жүрмін. Ұрудың әдісін де үйреніп алған. Денеме жарақат түсіп, көгеріп қалмасын деп басым мен жағымнан ұра берген”, – деді ол.

Ақсұңқар бұған дейін де тұрмыстық зорлық-зомбылық көріп жүрген. Тіпті бұрын қолын сындырған дейді. 

“3 қыздан кейін ұл жоқ деп шу шығарады. Мойныма пышақ салған күні де болды. Үйге сол кезде полиция шақырттым, бірақ асты-үстіме түсіп, енді қаталамаймын деген соң кешірдім. Бірақ тағы қайталанып отыр. Енді кешірмеймін, ажырасып, ұрғаны үшін жазаға тартамын”, – деді Ақсұңқар. 

Одан бөлек Ақсұңқардың бір қызының құлағының мүкістігі бар. Қазір ол қызының отасына ақша жинап жүр.

Күйеуінің озбырлығынан шаршаған келіншек әділдік сұрайды. Ол ауруханаға түскен соң полицияға арыз жазды. Алайда күйеуі тергеу изоляторына қамауға алынбапты. 

Stan.kz тілшісі Маңғыстау облыстық полиция департаментіне сауал жолдады. 

“Денсаулыққа қасақана жеңіл зиян келтiру дерегі бойынша қылмыстық іс тіркелді. Полиция қажетті тергеу амалдарын жан-жақты жүргізіп жатыр. Болған оқиғаның мән-жайы анықталуда. Ер адамға қатысты "ешқайда кетпеу" бұлтартпау шарасы қолданылды. Өзге ақпарат тергеу мүддесі үшін жария етілмейді”, – деп мәлімдеді Маңғыстау облыстық полиция департаментінің баспасөз қызметі.