RUS
SMARTNEWS.KZ басылымының хабарлауынша, ақтөбелік жергілікті кәсіпкер, бақшашы Спартак Төремұратов қоластындағы жұмысшыларын Түркия еліне демалуға апарған.
Бұл туралы Ақтөбе газетінің журналисі Самат Нарегеев әлеуметтік желідегі парақшасында жазды. Айтуынша, Спартак Төремұратов Ақтөбе өңірінде қарбыз бен қауын өсірумен айналысатын бақшашы көрінеді.
Ойыл ауданы Саралжын ауылдық округінің тұрғыны Спартак Төремұратов облыс тұрғындарына қауын-қарбызымен жақсы танымал. Ауданның брендіне айналған оның өнімдеріне сұраныс өте жоғары. Ол бұл кәсіппен он жылдан астам уақыт айналысып келеді. Жазғы маусымда ауылдың оқушылары, студенттері Спартактың бақшасында жұмыс істеп, табыс табады. Бақша иесі күзде бірнеше жұмысшыларды еліміздің ірі қалаларына қыдыртады. Биыл да 7-ші рет сапарлары жалғасбақ. Оған алдын ала билет алынып қойған.Ал әзірге шаруашылықтың жұмысшысы мен тракторшысын өз қаржысына Қара теңізге апарып қыдыртып жүр. Спартактың арқасында ауыл балалары ел көріп шетелге шығып отыр, - деп жазды журналист.
Журналист кәсіпкердің көктемдегі су тасқынының кесірінен шығынға ұшырағанын айтты. Бірақ бақшашы соған қарамастан өз қаржысына жұмысшыларын Анталияға саяхаттауға апарған.
Ол табыстың көптігінен емес. Спартактың мақсаты — ауыл балаларының көкжиегін кеңейту. Екі жылдан бергі су тасқыны шаруашылықты біраз шығынға ұшыратқан. Биылғы өнімі де ойдағыдай болмапты. Оған себеп — су тасқыны жердің құнарын алып кетеді екен. Қарбыздары толық өспей қалып 7-8 миллион теңге шығынға батқан. Соған қарамастан көктемде айтқан уәдесін жұтпайын деп жұмысшыларды Анталияға апарды. Қазіргі таңда жастар жаз бойғы еңбегінің жемісін көруде. Бір адамға шамамен 450-500мың теңге шығады екен. Мұның бәрі Спартактың қалтасынан. Жастарды жыл сайын қыдыртатын Спартактың экскурссиясына мемлекет неге қолдау жасап жеңілдіктер қарастырмайды? Облыс бойынша бұлай серуендететін жалғыз Спартак қана, - деп жазды ол.