RUS
SMARTNEWS.KZ басылымының хабарлауынша, Алматы облысы Талғар қаласында өлтірілген жасөспірімнің туыстары күдіктілердің барлығы бірдей ұсталмағанын айтса, Алматы облыстық полиция департаменті бастығының міндетін атқарушы Серік Шалқаров кей тұлғалардың бұл іске қатысы бар-жоғы анықталып жатқанын айтты. Бұл туралы Stan.kz ақпарат агенттігі жазды.
Полиция кәмелетке толмаған баланы өлтіру дерегі бойынша қылмыстық іс қозғады.
Полиция оқиғаға кінәлі барлық қатысушылар ұсталып, уақытша ұстау изоляторына қамалғанын мәлімдеді. Әзірге жеті адамның қатысы бар екені анықталды.
Шалқаров жәбірленуші тараптың қалған адамдарға қатысты уәждері негізінде тергеу аясында тексеру жүргізіліп жатқанын айтты.
"Қазір олардың әрқайсысына құқықтық баға беріледі. Оның ішінде бейнебақылау камераларының жазбалары да зерттеліп жатыр. Тергеу барысы Ішкі істер министрінің арнайы бақылауында", – деді ол.
Құқық қорғау органдары да тергеу барысы туралы жәбірленушінің туыстарын хабардар етіп жатқанын айтты. Тергеу мүддесіндегі басқа ақпарат жария етілмейді.