«Өнерде 46 жыл жүрдім»: «Барыс» орденін иеленген Нұрлан Өнербаев зейнетке шығып жатқанын айтты

SMARTNEWS.KZ басылымының хабарлауынша, өнер иесі "Таңшолпан" бағдарламасында қонақта болып, марапатын күтпегенін жасырмады. 

“Қатты толқыдым деп айта алмаймын. Бір жағынан күтпеген жағдай. Шын айтса, дәл осындай марапат болады деп күткен жоқпын. Ұйғарған екен, лайықты деп тапқан екен. Он күннен кейін жасым 63-ке толып, зейнетке шығамын. Өнердің табалдырығын аттағаныма 46 жыл болады екен. 46 жыл артта қалғанда өнеріме, шығармашылығыма шабыт беретін осындай үстеме жасайды деп күткен жоқпын. Марапат болатынын хабарлады. Бірақ нақты қандай болатынын айтпады", – деді әнші. 

Сонымен қатар өнер иесі мұндай жетістікке композиторлар мен тыңдармандардың арқасында жеткенін айтып, оларға алғысын білдірді.

"Өнер табалдырығын 1978 жылы аттадым. Содан бері ел алдына шығып, орындап жүрген әндерім тыңдармандардың жүрегіне жетіп, көңілінің төрінен орын алған әндер деп айтсам қателеспейтін шығармын. Мен кеше осы марапатты алып тұрып, өзімнің ішкі ойым бірінші кезекте менің авторларым мен композиторларымда болды. Осы жылдарда елге сүйкімімді арттырған, мені танымал еткен, көрерменнің көңіліне көтерген ең тамаша, қанатты, сұлу әндерді ұсынған екен маған. Кеше өмірден өтіп кеткен композиторлар, бүгінде ортамызда жүргендер де бар. Бірінші кезекте соларға алғысымды айтамын. Екіншіден, менің тыңдармандарымның арқасы. Осы марапттар да, ел алдында осылай еркелеп жүруіміз де солардың ыстық ықыласы, қошеметі, махаббаты", – деді өнер өкілі.