RUS
SMARTNEWS.KZ басылымының хабарлауынша, ақтөбелік келіншектің қоңырауын жауапсыз қалдырған диспетчер 2 жылға сотталған еді.
Алайда Ақтөбе облыстық соты төтенше жағдайлар қызметінің жедел диспетчері Әділ Қалидолланың жазасын жеңілдетті.
Аппелляциялық сот 21 қазанда диспетчердің қыркүйекте шығарылған үкімін қайта қарады. Нәтижесінде екі жыл бас бостандығынан айыру жазасы екі жылға бас бостандығынан шектеуге ауыстырылды.
Үкімді өзгерту туралы шешім қандай қабылданғанын облыстық сот нақтылаған жоқ.
Айта кетсек, 9 маусымда сағат 12:18-де құтқару қызметіне 55 жастағы Клара Сұлтанбаева қоңырау шалады. Әйел өзін әлдекім автокөлікте қауіпсіздік белбеуімен тұншықтырып жатқанын айтқан. Сол күні ол Toyota Camry автокөлігін сатуға шыққан.
Әйел бұл ешқандай әзіл емес, шындық екенін жанұшыра жеткізген. Тіпті "олар мені өлтіреді!" деп қатты айқайлаған. Бірақ қоңырауды қабылдаған құтқару қызметінің диспетчері Әділ Калидолла тек мекен-жайын нақтылаумен шектелген. Жағдайды анықтау үшін қайта қоңырау шалмаған. Көмек жібермеген. Салдарынан Клара Сұлтанбаева қаскөйлер қолынан қаза тапқан.