RUS
SMARTNEWS.KZ басылымының хабарлауынша, әлеуметтік желіде танымал блогер Бейбіт Әлібековтің Lamborghini көлігімен жасалған қауіпті трюктің арты адам өлімімен аяқталды.
Оқиға 29 қазан күні Алматы-Астана тас жолындағы Сокол автодромында болған. Автодромда арнайы трюк жасалуы қажет еді. Батырхан есімді жігіт жүріп келе жатқан Lamborghini көлігінің үстінен секіруі керек болған. Қорқынышты трюк барысында 45 жастағы Анатолий Подлипалин жігітті қағып кеткен. Көліктің танымал блогер Бейбіт Әлібековке тиесілі екені анықталды.
Оқиғадан кейін Батырхан Іле ауданындағы орталық ауруханаға жеткізіліп, оған ауыр бас-ми жарақаты, самай сүйегінің сынуы және үшінші дәрежелі кома диагнозы қойылған.
- Нәтижесінде жәбірленуші аудандық ауруханаға жатқызылды, онда 30 қазан күні есін жимастан жан тапсырды. Осы факті бойынша полиция қылмыстық іс қозғады. Тергеу жүргізіліп жатыр, - деп хабарлады облыстық Полиция департаментінің баспасөз қызметі.
Блогер Бейбіт Әлібеков көлігіне қатысты оқиғаны түсіндірді.
- Батырхан Ержан есімді жігіт менен көлікті қайта-қайта сұрады. Трюк жасап, видеоға түсіргісі келетінін айтқан. Бірнеше рет сұрағаннан кейін көлігімді бергенмін. Қайғылы оқиға трюк жасау кезінде болған. Артынша ол ауруханада көз жұмды. Көлігімді бермеуім керек еді. Отбасы мен жақындарына қайғырып көңіл айтамын, – деді Әлібеков.
Бұған дейін мұндай қауіпті трюкті америкалық блогер IShowSpeed бастап, артынша оның бұл трюгі желіде қатты танымал болған еді. Марқұм америкалық блогердің хайпқа айналған бейнежазбасын қайталағысы келген болуы мүмкін.