RUS
SMARTNEWS.KZ басылымының хабарлауынша, белсенді Жадыра Досекеева «желіде алауыздық қоздырғаны» үшін сотталды.
Жадыра Досекееваның үстінен маусым айында «Телекоммуникация желілерін пайдалана отырып, әлеуметтік алауыздықты қоздыру» бабы бойынша қылмыстық іс қозғалған. Оған Досекееваның сәуір айында TikTok желісінде жариялаған «Құл болмау үшін билікті өзгерту керек» деген сарындағы пікірі себеп болған.
Айыптау актісіне сай, Досекееваның әлеуметтік желілердегі пікіріне филологиялық сот сараптамасы жасалып, «билікті сынау белгісі бар, бірақ билікті күшпен басып алуға шақыру байқалмады» деген тұжырым жасалған. Досекееваның жазбалары арасында 2022 жылғы Қаңтар оқиғасын халықаралық тергеуге шақырған ұсынысы да бар.
Досекееваның адвокаты Айгүл Айжарықова айыпталушының жазбаларына жасалған филологиялық сараптама қорытындысы «контекстен жұлып алынған жеке сөздерге негізделген» деді.
Жаңаөзендік белсенді Жадыра Досекееваға сот 3 жыл шартты жазасын өтеу, 3 жыл әлеуметтік желілерге кірмеу, 100 сағат қоғамдық жұмыстар жасау және 73 мың теңге айыппұл төлеу туралы үкім шығарған.
Бұл мәселеге қатысты Маңғыстау облысы полиция департаментінің өкілдері пікір білдірді.
Сотталушы Жадыра Досекеева өзінің кінәсін мойындамай, соттан ақтау үкімін шығаруды сұрады. Жадыра Досекееваның кінәсі куәлердің жауаптарымен, психологиялық-филологиялық сараптама қорытындысымен, істің басқа да құжаттарымен дәлелденді. Сот Жадыра Досекееваға жаза тағайындау барысында асырауында кішкентай балаларының болуын қылмыстық жауапкершілігін жеңілдететін мән-жайлар деп таныды, - делінген хабарламада.
Сот қаулысы әлі күшіне енбеді. Адвокат «сот шешіміне келіспейміз, апелляциялық шағым түсіреміз» деп айтты.