RUS
SMARTNEWS.KZ басылымының хабарлауынша, Белгілі ақын, журналист Ханбибі Есенқарақызы «Нурикамал» фильмі туралы ойын, мелодраманың кемшін тұстары туралы айтты. «40 жылға жуық уақыт болса да әлі сахнадан да, той-жиындарда айтылып келе жатқан әннің өміршеңдігі тазалығында» деді ақын Nege.kz порталына берген сұқбатында.
Басылым тілшісі «Нурикамалды» көргендердің арасында «Отбасы бола тұра басқа әйелге ғашық болуды насихаттаудың керегі не?» деп пікір айтқандар барын тілге тиек етті. Ал ақын «туынды – таза адамдардан шыққан таза махаббаттың үлгісі» екенін айтты.
«Бұл біреудің отбасын бұзу үшін насихатталған дүние емес. Бұл – өнер адамдарына тән. Әрбір адам – бостан. Біреуге біреу тәуелді емес. Бұл жерде жасандылық, тәуелділік жоқ. Композитордың ғашық болуға құқы бар. Әннің жақсы болғаны үшін ақын ретінде сөзін жазып бергенімді дұрыс деп санаймын.
Бірақ композитор еш уақытта Нурикамалмен байланыста болған жоқ. Нурикамал да ақыл-ойы бар әйел. Бір жерінде «Біреудің отбасын бұзған адам бақытқа жете алмайды» деп айтатыны бар ғой. Ол да – персонаж. Композитор да, Нурикамал да жақын қарым-қатынас орнатпаған, таза күйінде қалды. Ешқандай отбасы бұзылған жоқ. Барлығы өз орнында», - деп жауап берді Ханбибі Есенқарақызы.
Оның сөзінше, тазалықтан туған ән халықтың жүрегіне жетіп, 40 жылға жуық уақыт болса да әлі сахнадан да, той-жиындарда айтылып келе жатыр.
«Ал енді солардың махаббатын қағазға түсірген менде де кінә жоқ. Бұл – таза адамдардан шыққан таза махаббаттың үлгісі», - дейді ол.
Тілші әйел қауымы осы фильмнен кейін Ханбибі апамыздың әрекетін ерлікке балап жатқанын, көп әйел мұндай кеңдікке бара алмайтынын жеткізген.
«Бұл жерде мен әйелдіктен гөрі ақындықты, өнерді жоғары қойдым. Абай «Көңілге түрлі ой салар, жақсы ән мен тәтті күй» демей ме? Біз осы сөздің қадіріне әлі жетпедік. Жақсы ән ой салды. Сондықтан мәтінін жазып беруге тура келді. Әрине, бұл маған да оңай болды деп айта алмаймын. Десе де, ән ауға түскен балықтай, торға түскен құстай бұлқынып тұрды. Себебі, сөзі жоқ болған соң шықпай тұр. Сөзін жазып бергенім үшін кінәлі емес шығармын», - дейді Ханбибі Есенқарақызы.