RUS
SMARTNEWS.KZ басылымының хабарлауынша, Күрестен әлем чемпионатының күміс жүлдегері Жәмилә Бақбергенова бұл жетістігі мен сыйақы мәселесі туралы пікір білдірді. Бұл туралы "Бірінші бол" сайты жазды.
Жәмилә Бақбергенова үш мәрте әлем чемпионатының күміс медалін (2021, 2022, 2024) қанжығасына байлады. Сондай-ақ ол 2023 жылы Белградта өткен әлем чемпионатында қола медаль жеңіп алған болатын.
"Тиранада алтын аламыз деген ой болды. Мақсат – әрқашан чемпион болу. Маған қалай күресуді, тактиканы жеке бапкерім белгілеп береді. Негізінен финалда бәрі дұрыс болды. Тіпті ұпай саны бойынша да алға шықтым. Бірақ күтпеген жерден қателікке бой алдырып, уыста тұрған алтын сусып шығып кетті. Бұл өкініштің орны алда жарыстарда толады деген үміттемін. Көкейдегі әлем, Олимпиада чемпионы болсам деген арман ешқашан өшкен емес", - деді Жәмилә Бақбергенова.
Тиранада өткен әлем чемпионатында алтын медаль еншілеген еркін күрес шебері Нұрқожа Қайпанов пен күміс жүлдегер грек-рим күрес шебері Ержет Жарлықасынға автокөлік табысталды.
"Әлем чемпионатынан кейін ешқандай сыйақы алмадым. Бұйырған дүние болса алатын шығармыз. Алда федерация желтоқсан айында марапаттайды", - дейді Жәмилә Бақбергенова.
Айта кетейік, Жәмилә Бақбергенова әйелдер күресінен 72 кг салмақ дәрежесіндегі әлемдік рейтинге 4-орыннан 2-орынға көтерілген болатын.