RUS
SMARTNEWS.KZ басылымының хабарлауынша, қомақты қаржы жымқырды деп күдікке ілінген Перизат Қайраттың желіде жалған сұхбаты пайда болды. Материалдың фейк екенін Stopfake.kz сайты мәлімдеді.
Әлеуметтік желілерде белсенді тұлға және қоғамдық қайырымдылық қор құрылтайшысы Перизат Қайраттың сұхбаты жарияланды. Онда ол Қаржылық мониторинг агенттігі таққан барлық айыптарды жоққа шығарған.
«Бұл алаяқтар адамдарды алдау үшін қолданатын фейк сұхбат. Посттың тақырыбы қызықты және онда «Tengrinews.org» қазақстандық «жаңалықтар сайтына» сілтеме жасалған. Мұқият қарасақ, сайттың домені ұлттық «Tengrinews.kz» емес, халықаралық «.org» екенін байқауға болады. «Tengrinews» жаңалықтар порталы «.kz» доменін пайдаланады. Қылмыскерлер неғұрлым сенімдірек болуы үшін қазақстандық интернет-басылымның басты бетін толығымен көшіріп алған», - деп жазылған сайтта.
Сұхбат мәтінінде алаяқтар «пассивті кіріс» ұсына отырып, танымал қазақстандық банктің бағдарламасын жарнамалайды. Шын мәнінде, бұл бағдарламаның қаржы институтына ешқандай қатысы жоқ, ол қылмыстық схеманың бір бөлігі болып табылады. Киберқылмыскерлер жалған сайтта тез арада дивиденд төленетінін айтып, өтінім толтыруды ұсынады.
«Олардың қулығына түсіп қалмаңыз: күмәнді сауалнамаларды толтырмаңыз және оңай пайда табуды ұсынған бейтаныс адамдарға сенбеңіз. Шындығында, белсендіге тағылған айыптар жоққа шығарылған жоқ, ал ақпараттың өзі алаяқтық схеманың бір бөлігі болып табылады. Алаяқтардың көздеген мақсаты – жеке деректеріңіз бен ақшаңызды иемдену үшін сізді жалған сайтқа тарту», - дейді.