RUS
Аталған бағытта қолға алынған «Тіл тағдыры – ел тағдыры» жобасы елімізде мемлекеттік тілдің қолданылу аясын кеңейтіп, жастардың қазақ тілінде білім алып, шығармашылық қабілеттерін дамытуға зор ықпал етті.
Жоба аясында 2023-2024 жылдар аралығында атқарылған іс-шаралар тілдің әлеуметтік өмірдегі маңыздылығын арттырып, оның болашағына деген сенімді нығайтты.
1. Aqyl Battle Cup: Қазақ тілінде зияткерлік ойындардың жаңа деңгейі
«Aqyl Battle Cup» сайысы – осы жобаның ең ауқымды және көрнекті шараларының бірі. Бір жыл бойы қазақ тілінде өткен зияткерлік ойынға 1500-ге жуық жас пен этнос өкілдері қатысты. Бұл сайыс жастар арасында зияткерлік ойындарды насихаттап, қазақ тілінің маңыздылығын арттыруға бағытталды
Сайыс аясында екі маңызды іс-шара ұйымдастырылды:
Instagram байқауы: «Креативті команда» байқауы жастардың шығармашылығын дамыту мақсатында өткізілді. 70 креативті видеоролик әзірленіп, @aqylbattle_cup парақшасында жарияланды. Бұл байқау қатысушылар арасында ынтымақтастықты қалыптастырып, жастарды қазақ тілінде шығармашылық жұмыстарды көрсетуге ынталандырды.
КТК сайыстары: «Aqyl Battle Cup» сайысының үш кезеңі өткізілді. Жүлде қоры 3 600 000 теңгені құраған финалдық кезеңде 20 аймақтан 21 команда қатысып, «Ертіс» командасы бірінші орынды иеленіп, 1 200 000 теңге ұтып алды.
Бұл шаралардың барлығы қазақ тілінде интеллектуалды бәсекелестікті дамытуға, жастардың осы тілде білім алып, ой-өрісін кеңейтудегі рөлін айқындауға бағытталды.
2. «Елім дегендер»: Мемлекеттік тілде шығармашылық байқауы
«Елім дегендер» шығармашылық байқауы мемлекеттік тілде жүзеге асырылған тағы бір маңызды іс-шара болып табылады. Байқауға Қазақстанның барлық этнос өкілдері қатысып, қазақ тілінде өз өнерлерін көрсетіп, шығармашылықтарын бағалауға мүмкіндік алды.
Байқау аясында:
Ақындар мүшәйрасы, көркемсөз өнері және эссе жазу номинацияларында 200-ден астам өтінім қабылданып, 100 қатысушы финалға шықты.
Байқау туралы ақпарат мектептер, жоғары оқу орындары, БАҚ өкілдері және танымал блогерлер арқылы кеңінен таратылып, қазақ тілінде шығармашылықты насихаттау жұмыстары жүргізілді.
Байқау жеңімпаздары дипломдармен және ақшалай сыйлықтармен марапатталды, жалпы жүлде қоры 3 000 000 теңгені құрады. Бұл байқау қазақ тілінде шығармашылықты дамытуға, жастардың өзін-өзі көрсетуіне ықпал етті, сондай-ақ мемлекеттік тілдің қолданыс аясын кеңейтті.
3. Мемлекеттік тілдің этнос аралық қатынас тілі ретіндегі рөлін арттыру
Жобаның басты мақсаттарының бірі – мемлекеттік тілдің этносаралық қатынас тілі ретіндегі рөлін күшейту. Қазақстанда түрлі ұлт өкілдері өмір сүретіндіктен, мемлекеттік тіл барша азаматтар үшін ортақ байланыс құралы болуы тиіс. Осы бағытта атқарылған жұмыстар мемлекеттік тілдің бірлік пен келісім құралы ретінде қолданылуын қамтамасыз етті.
Жобаның нәтижесінде мемлекеттік тілдің қолдану аясында айтарлықтай өзгерістер орын алды. Қазақ тілінің жастар арасында танымалдығы артты, бұл тілдің болашақта елімізде кеңінен қолданылуына мүмкіндік береді.
Жобаның негізгі нәтижелері мен маңызы
«Тіл тағдыры – ел тағдыры» жобасының нәтижелері айтарлықтай оң болып табылады:
Мемлекеттік тілде 1500-ге жуық жастардың қатысуы, 3 600 000 теңге көлемінде жалпы жүлде қоры, Қазақ тілді жастардың жаңа шығармашылық алаңының қалыптасуы, Мемлекеттік тілдің әлеуметтік желілерде танымалдылығының артуы.
Бұл жоба қазақ тіліне деген сұранысты арттырып, жастардың осы тілде білім алуға, сөйлесуге және шығармашылықты дамытуға деген ынтасын күшейтті.
Қазақ тілі – болашақтың тілі!
«Тіл тағдыры – ел тағдыры» жобасы қазақ тілінің мәртебесін көтеруге бағытталған маңызды қадам болды. Қазақ тілі — біздің рухани байлығымыз, ол тек ана тілі ғана емес, еліміздің болашағының да тілі. Мемлекеттік тілдің қолдану аясын кеңейту, оны жастар арасында дамыту — біздің басты мақсатымыз.
Алдағы уақытта да осы бағыттағы жұмыстар жалғасады. Біз қазақ тілінің аясын кеңейтіп, жастарды осы тілде білім алып, шығармашылықтарын дамытуға шақырамыз. Қазақ тілі — тек тіл ғана емес, ол біздің ұлттық болмысымызды, тарихымызды сақтап, ұрпақтан-ұрпаққа жеткізетін басты құрал болып табылады.