RUS
SMARTNEWS.KZ басылымының хабарлауынша, Ақтаудағы ұшақ апатында қаза тапқан бортсерік Хокума Әлиева осы рейстен соң жұмысын ауыстырмақ болған. Бұл туралы Информбюро бағдарламасы жеткізді.
Ақтаудағы апаттан аман шыққан жолаушылар ұшақты басқарған экипаж мүшелерінің жанкештілігінің арқасында тірі қалғанын айтты. Әсіресе, "Бәрі жақсы болады" деп адамдарды сабырға шақырып, төтенше жағдайдағы қауіпсіздік ережесін түсіндірген бортсерігі Хокума Әлиеваның ерлігін ерекше атап өтті.
Жолаушылардың айтуынша, қызметкердің бұл әрекеті ондаған азаматтың өмірін сақтап қалған. Бірақ өкінішке қарай міндетін соңына дейін атқарған бортсеріктің өзі апатта ажал құшты. Хокума Әлиеваның ата-анасының айтуынша, қыздары осы сапарды аяқтаған соң, стюардесса қызметінен заңгер мамандығына ауысуы керек болған.
“Қызым 33 жаста еді. Оның AZAL компаниясында жұмыс істегеніне биыл 9 жыл болған. Өте ауыр жағдай. Аман қалғандардың тезірек сауығып кетуін тілеймін”, – дейді Хокума Әлиеваның әкесі Джалил Әлиев.