RUS
SMARTNEWS.KZ басылымының хабарлауынша, Атырауда жаңа жыл түнінде отбасының тыныштығын бұзған 15 адам полицияға жеткізілді. Бұл туралы Kazinform жазды.
Атырау облыстық полиция департаменті баспасөз қызметінің мәліметіне сүйенсек, бүгін таңға дейін тәртіп сақшыларына 205 шақырту түскен.
– Жаңа жыл түнінде полицияға 201 хабарлама түсті. Көпшілік іс-шара кезінде балалардың ата-аналарынан адасып қалу дерегі тіркелмеді. Көшелерде бұзақылық әрекеті тіркелмеді. Алайда отбасының шырқын бұзған 15 адам анықталып, полиция бөлімдеріне жеткізілді. Жол бойында 25 жол-көлік оқиғасы тіркелді, - деп хабарлады департаменттің баспасөз қызметі.
Атырау облыстық полиция департаментінің бастығы, полиция генерал-майоры Нұрхат Оразбаевтың айтуынша, жаңа жыл мерекесіне орай тұрғындардың тыныштығы мен қоғамдық қауіпсіздікті қамтамасыз ету үшін полицейлер күшейтілген режимде қызмет атқаруда.
– Біздің басты мақсатымыз – тұрғындардың қауіпсіздігін қамтамасыз ету. Өйткені мереке күндері жаяу жүргіншілердің де, көліктің ағыны артады. Осыған байланысты полицияның жеке құрамы қоғамдық тәртіпті сақтау, қала мен ауылдардағы көшелерде құқық бұзушылықтардың алдын алу мақсатындағы тиісті жұмыстарды атқарады. Пиротехника салдарынан болуы мүмкін оқыс оқиғаларды болдырмауды басты назарда ұстайды, -дейді Нұрхат Оразбаев.