RUS
SMARTNEWS.KZ басылымының хабарлауынша, Шымкентте «неотәңіршілдікті» насихаттаған тұрғын жазаланды. Бұл туралы Шымкент соттарының Telegram-дағы арнасы жазды.
Шымкент қаласының қылмыстық істер жөніндегі ауданаралық сотында К.-ға қатысты қылмыстық іс аяқталды. Ол Қылмыстық кодекстің 174-бабы 1-бөлігі (діни алауыздықты қоздыруға бағытталған қасақана әрекеттерді жасау) бойынша айыпталған.
Тұрғын 2023 жылдың тамыз айы мен 2024 жылдың қыркүйек айы аралығында TikTok әлеуметтік желісіндегі өз парақшасында «неотәңіршілдік» дініне қатысты «стрим» тікелей хабарларын өткізіп, әлеуметтік желісін қолданушылар арасында ислам дінін ұстанушыларға қарсы діни алауыздықты қоздыруды негіздейтін ойларын жария жасаған.
Сотталушының кінәсі іс бойынша жинақталған дәлелдемелердің жиынтығы арқылы толық дәлелденеді. Прокурор сотталушыға бас бостандығынан айыру жазасын тағайындауды сұрады. Ал тұрғын кінәсін мойындамай, өзін ақтауды өтінді.
«Сот К.-ға жаза тағайындауда қылмыстық жауапкершілігін жеңілдететін және ауырлататын мән-жайлар анықтамағанын, сонымен қатар, сотталушының жасаған іс-әрекеттеріне өкініш білдірмегенін ескерді. Сот К-ны Қылмыстық кодекстің 174-бабы 1-бөлігі бойынша кінәлі деп танып, түпкілікті 2 жыл мерзімге бас бостандығын шектеу жазасын тағайындады», - делінген хабарламада.
Сот үкімі заңды күшіне енген жоқ.