RUS
SMARTNEWS.KZ басылымының хабарлауынша, Ақтөбеде Қопа ауылында жасөспірімдердің соққысынан мерт болған оқушының туыстары тергеу барысына наразы. Сөздерінше, 14 жастағы Нұржан Сыдықтың өліміне күдіктілердің үстінен “Адам өлтіру” емес, "Адам өліміне әкеп соққан денсаулыққа ауыр зиян келтіру" бойынша іс қозғалып жатыр. Бұл туралы КТК арнасының жаңалықтар қызметі жеткізді.
Қопалық оқушы Нұржан Сыдық 2 қыркүйекте мерт болды. Сөздерінше, оны жоғары сынып оқушылары ұрып-соғып, моншаның артына тастап кеткен. Барлық материал жинақталды, жақын арада сот процесі басталады деседі. Алайда баланың отбасы күдіктілерге тағылған айыппен келіспейді.
“Істі 106-бабының 3-бөліміне “Адам өліміне әкеп соққан денсаулыққа ауыр зиян келтіру” деп қайта өзгертілгенін күні кеше білдік. Ақтөбе прокуроры соңғы жұмыс күні, яғни 9 қаңтарда бапты қайта саралауды жою туралы ұйғарымға қол қойған. Бұл істен "Адам өлтіру" бабы алып тасталды. Біз мұнымен келіспейміз. Енді бапты өзгертпей тұрып, сотқа кетіп қала ма деп алаңдаймыз”, – деді марқұм баланың әпкесі Айжан Сыдықова.
Осы іске қатысты алты адам қамауға алынды. Алайда, марқұмның туыстарының айтуынша, сол түні 18 жоғары сынып оқушысы болған. Зардап шеккендер кінәлілер лайықты жазаланбай ма деп қорқады. Тергеуші мектеп оқушысы абайсыздықтан өлтірілді деп есептеген. Полиция қырғынның себебін әлі жариялаған жоқ.
“Қылмыстық істі 99-баптың 2-бөлігі "Кісі өлтіруден" 106-бабының 3-бөлігі "Адам өліміне әкеп соққан денсаулыққа ауыр зиян келтіру" деген санатқа өзгерту туралы процессуалдық шешім қабылданды. Қазіргі уақытта қылмыстық іс аяқталып, тексеріліп жатыр. Қаралған соң қылмыстық іс сотқа жолданады”, – деп мәлімдеді Ақтөбе облысы ДП баспасөз қызметінің жетекшісі Ерболат Сарқұлов.