RUS
SMARTNEWS.KZ басылымының хабарлауынша, Түркістан облысының Өзбекстанмен шекарасында мыңдаған тонна картоп шіріп жатыр. Себебі, Павлодардан Ташкентке жеткізілуге тиіс картопты ауыл шаруашылығы бөлімінің өкілдері тексереміз деп, Сарыағаш шекарасында тоқтатқан. Сөйтіп он күн бойы шенеуніктер құжат тексеріп жүргенде, 43 вагонға артылған картоп бұзыла бастапты. Бұл туралы КТК жаңалықтар қызметі жеткізді.
Картоп тиеген вагондар Сарығаштың темір жолында тапжылмай он күн тұр. Павлодардан шыққан жүк пойызын фито-санитарлар 19 қаңтар күні тоқтатып, жүктің құжаты мен өнімді тексереміз деген. Бірақ сол күйі ешқайсысы төбе көрсетпеді деген кәсіпкерлер артылған картоптың күйін көру үшін вагонды ашып көрді.
— Картоптың суы шығып, іріп-шіріп жатыр. Бұл қайта суы қатып тұр, жылыға шықса бірден шіриді. Бұл енді жарамсыз картоп. Бір вагонның өзінде 68 тонна бар, сол 68 тонна вартоп енді жарамсыз, – дейді кәсіпкер Азамат Серікбаев.
Он күннен бері жауаптылардан хабар күтіп жүргендер енді бұл шіріген тауарды тапсырыс берушілерге «не бетімізбен апарамыз» деп күйінеді. Үсіп, былжырап кеткен картопты кейбірі лақтырып та жатыр.
Жалпы 43 вагон картопқа кәсіпкерлер құжатты 15 қаңтарға дейін жасатқан. Ал бұл өнімді елден тыс шығаруға болмайды деген қаулыны ауыл шаруашылығы министрлігі 18 қаңтардан бастап шығарған. Сондықтан тез бұзылатын өнімді шекарада негізсіз ұстап тұрғандар картобымызды жарты бағасына сатуды талап етті дейді.
— Әкімдік бізге жарты бағасына сұрап тұр. 100-150 теңгеден сұрайды. Келісін 300-ден алғанбыз. Келем дегенше, ірі картоп 370 теңгеден келген, осы жерге дейінгі шығыны. Олар 150 теңгеден сұрайды. п тұр. Білмейміз, енді не істейтінімізді. Шығынның бәрі мойнымызда. Қазір үш вагоннан 60 миллион шығын шығып тұр. Ол оңай ақша емес қой, – дейді кәсіпкер Нұрсұлтан Орманов.
Ал вагондарды тұралатып қойған құзырлы министрлік осы уақытқа дейін «құжаттарды тексердік» дейді. Бірақ түйткіл болмаған соң, енді 43 вагон діттеген жеріне жүре берсе болады деп отыр.
— Бүгінгі күні менің ақпаратым бойынша тексеру жұмыстары бітті. Қажетті ақпараттар анықталды. Сондықтан бүгінгі күнге вагондардың сыртқа кетуіне ешқандай тосқауыл жоқ. Сондықтан экспортқа бағытталған 43 вагон картоп артылған шекарадан шығып кете береді, – дейді ҚР Ауыл шаруашылығы вице-министрі Ербол Тасжүреков.
Он күн бойы тұралап тұрған вагондардың жылжуына рұқсат берілді. Алайда картоптың «жарамдысынан жарамсызы көп» деген кәсіпкерлер енді шығынын есептеп, тез бұзылатын өнімді тым көп ұстаған шенеуніктерді сотқа береміз деп бекініп отыр.