RUS
SMARTNEWS.KZ басылымының хабарлауынша, депутат Бақытжан Базарбек Қазақстанда ағаш егуге бөлінген миллиардтаған қаражат жымқырылып жатқанын айтты.
"Менің қолымда барлық облыс әкімдіктері ұсынған статистика бар, онда бюджет қаражатының жымқырылғаны айдан анық. Орман өсіреміз деген желеумен миллиардтаған ақша жымқырылып жатыр. 2020 жылы президенттің тапсырмасымен орман қорындағы жерлерде ағаштар санын көбейту үшін 2 млрд ағаш, ал елді мекен жерлерінде 15 млн ағаш егу жоспарланған. Мен бұл 2 млрд ағаш пен 15 млн ағаш қайда егілгенін анықтап көргім келді. Менде барлық әкімдіктің жауабы бар. Таңғалып отырмын. Ағаш саны жеткіліксіз. Егілуге тиіс 15 млн ағаш қайда? Миллиард ағаш туралы мүлдем ауыз ашпай-ақ қояйын", - дейді Базарбек.
Оның деректері бойынша Маңғыстау облысында 2021 жылы 556 мың ағаштың орнына шамамен 20 мыңға жуық ағаш егілген, 2022 жылы 167 мың ағаштың орнынан 21 мың тал егілген. Ал ШҚО-да 2021 жылы 127 мың ағаштың орнына 85 мың ағаш қана егіліпті.
"Міне, әр облыстағы жағдай осы. Кей жерде 30, кей жерде 50, кейбір жерлерде 150 мың ағаш жетіспейді. Менің сұрағым бар: мұны біреу бақылай ма әлде сіздер ақшаны тек бөлесіздер ме? Осы ағаштарды егуге бюджеттен қыруар ақша бөлінген. Бұл деректер бойынша бірде бір қылмыстық іс қозғалған жоқ. Ешкім жауапкершілікке тартылған жоқ", - деді Базарбек.
Депутаттың бұл статистикасына Экология министрлігі жазбаша жауап қайтаруға уәде берді. Сонымен бірге ведомство өкілі неге қылмыстық іс қозғалмағанының себебін де осы жауапта ұсынбақ.
"Отырғызылатын материал мен 2 млрд ағашқа қатысты: бұл жұмыстар орындалып жатыр. Сараптама барысында біз кей өңірлерде статистика деректерімен сәйкессіздіктер барын анықтап жатырмыз. Толық ақпаратты сізге жақын күндері ұсынуға дайынбыз", - деді экология вице-министрі Жомарт Әлиев.
Бақытжан Базарбек министрлікпен бірге ақша бөлінген, алайда іс жүзінде ағаштар егілмеген өңірлерді тексеру туралы ұсыныс жасады. Бұл облыстар - Жетісу, Абай, Ақтөбе, Ақмола, Атырау, ШҚО, Қарағанды, Маңғыстау және Түркістан облыстары.