RUS
SMARTNEWS.KZ басылымының хабарлауынша, Атбасар түрмесінде белсенді Тимур Данебаевты азаптаған 12 қызметкер сотта ақталып шықты. Бұл туралы Stan.kz жазды.
Ақмола облысының мамандандырылған ауданаралық қылмыстық соты аталған іс бойынша алқабилердің қатысуымен сот процесін өткізді.
Сот төрағасы Ибрагим Әлкеновтың түсіндіруінше, алқабилерге үш негізгі сұрақ қойылған. Алқабилер кеңесу бөлмесінде қылмыстық құқықбұзушылық оқиғасының болмағаны туралы шешімге келген. Нәтижесінде айыпталушылар кінәсіз деп танылып, сот оларды толық ақтау туралы шешім шығарған.
"Сот шешімімен бұрынғы 12 қызметкер толық ақталып, тергеу кезінде қамауда болған үш адам бостандыққа шықты. Сонымен қатар, ақталған азаматтар "заңсыз қылмыстық қудалау" үшін өтемақы талап етуге құқылы. Олардың мүліктеріне салынған тыйымдар алынып, тоғыз азаматқа қатысты кепіл сомасы қайтарылады. Сот үкімі заңды күшіне енген жоқ, оған 15 күн ішінде шағымдануға болады”, – делінген ақпаратта.
Мемлекеттік айыптаушы айыпталушыларға нақты бас бостандығынан айыру жазасын сұрағанына қарамастан, алқабилер көпшілік дауыспен оларды кінәсіз деп тапты.