RUS
SMARTNEWS.KZ басылымының хабарлауынша, Шалқар ауданы Тоғыз орта мектебінің оқушысы өз-өзіне қол жұмсады. Қазіргі кезде полиция іс қозғап, тергеу жүріп жатыр. Бұл туралы Kazinform жазды.
Оқиға 17 қаңтар күні оқушының өз үйінде болды. Шалқар аудандық білім бөлімінің басшысы Аянберген Башановтың айтуынша, сол күні оқушы өзін жайсыз сезініп, сабаққа бармаған. Ал кешкілік мал жайлап, анасы сиыр сауып, ішке кіріп кетеді. Кешкі ас әзірлеп, күткенімен бала келмей, анасы артынан барады. Сол кезде суицид жасағанын көреді.
— 10-сынып оқушысы толық отбасында тәрбиеленді. Әкесі теміржолда жұмыс істейді, анасы мектепте мұғалім. Хат анықталмады. Оқушы белсенді болған, спортпен шұғылданған. Оны ата-аналары да, ауыл тұрғындары да айтып тұр. Бұл ешқандай да буллинг емес, — деді Аянберген Башанов.
Ақтөбе облыстық ПД баспасөз қызметінің жетекшісі Ерболат Сарқұловтың айтуынша, кәмелет жасқа толмаған баланың өліміне қатысты қылмыстық іс қозғалып, тергеу жүріп жатыр. Полиция да буллинг анықталмағанын айтып отыр. Дегенмен «JAN AHUAL» психологиялық қолдау орталығы арнайы жоспар құрып, түрлі кездесу өткізді.
— Тоғыз орта мектебінің 8-11 класс білім алушыларына, ата-аналар мен педагогтеріне «JAN AHUAL» психологиялық қолдау орталығы жоспарлы түрде әдістемелік-психологиялық терапиялық жұмыстарын жүргізіп жатыр. Педагог-психологқа әдістемелік көмек көрсетілді. Әрбір оқушымен жеке әңгімелесу және сұхбаттасу ұйымдастырылды, ата-аналармен кездесу өткізілді. Биыл 25 қаңтарда облыс әкімінің кеңесшісі, прокуратура, полиция департаменті, облыстық білім басқармасы өкілдері, аудандық білім бөлімдерінің басшылары, психологиялық қызметке жауапты әдіскерлер, сондай-ақ 130-дан астам жалпы білім беретін мектептер мен техникалық және кәсіптік білім беру ұйымдарының педагог-психологтарының қатысуымен жасөспімдер арасындағы буллингтің, зорлық-зомбылықтың алдын алу тақырыптарында облыстық семинар-кеңес өтті. Семинар барысында қатысушылар бала құқықтарын қорғау, тұрмыстық зорлық-зомбылықтың, жасөспірімдер арасындағы буллинг пен кибербуллингтің алдын алуға байланысты өзекті мәселелерді талқылады, — деп хабарлады Ақтөбе облыстық білім басқармасының баспасөз қызметі.