RUS
SMARTNEWS.KZ басылымының хабарлауынша, Шымкенттегі «Парасат» колледжі директорының тәрбие ісі жөніндегі орынбасары екі студентті ұрып-соққаны үшін кінәлі деп танылды. Бұл туралы Stan.kz жазды.
Қазыбек Ержанов екі студенттің денсаулығына жеңіл зиян келтіргені және кәмелетке толмаған адамға қатысты қылмыстық құқық бұзушылық жасағаны үшін кінәлі деп танылды. Сот отырысында ол өз кінәсін мойындамады. Кейіннен өз әрекетіне өкініп, кешірім сұрады.
Нәтижесінде Ержанов 4 жылға шартты түрде бас бостандығынан айырылды. Сондай-ақ осы істің екі қатысушысы әрі студент Абзал Нұрбаев пен Аңсар Нұралханұлы да айыпталды.
Төтенше жағдай өткен жылдың қараша айында болған. Кәмелеттік жасқа толмаған Абдуғафар Ерсалиев пен Константин Зоринді колледждің жертөлесінде мұғалім үш сағат бойы ұстаған. Директордың орынбасары оларды әлеуметтік желіде орынсыз пікір жазғаны үшін соққыға жыққан. Сосын колледждің бейнебақылау камераларындағы видеоларды әдейі жойған. Дегенмен директордың орынбасары кінәсін өзі мойындаған.
“Шешім қабылдау кезінде айыпталушының бұрын сотты болмағаны, онкологиялық аурудан емделуге есепте тұрғаны, екінші топтағы мүгедектігі, материалдық және моральдық шығынды өтегені ескерілді. Жәбірленушілер оны бас бостандығынан айырмауды сұрады”, – деді кәмелетке толмағандардың істері жөніндегі мамандандырылған ауданаралық сотының судьясы Болат Қарабаев.
Төрт ай тергеу изоляторында отырған ұстазға қосымша жаза ретінде білім беру ұйымдарында жұмыс істеуге өмір бойына тыйым салынды. Ал сот білім бөліміне жеке ұйғарым шығарды. Нұрбаев пен Нұралханұлы бір жылға бас бостандығынан айырылды.
Сот үкімі заңды күшіне енген жоқ.