RUS
SMARTNEWS.KZ басылымының хабарлауынша, астаналық полицейлер Ресей азаматына 59 жылдан кейін анасын табуға көмектесті. Анасы мен қызының кездесуін учаскелік инспектор Бақытжан Сарманов ұйымдастырды.
- Биыл наурызда полиция пунктінің қызметтік нөміріне 59 жастағы Ресей Федерациясының азаматшасы хабарласып, анасын табуға көмек сұраған. Майор Сарманов жан-жақты тексеру жүргізіп, әйелдің туысын анықтай алды. Әйел әуе билетін сатып алып, жақында Қазақстанға ұшып келді, - деп хабарлайды Polisia.kz.
Анасымен қауышқан Ресей азаматы елордалық полицейге шексіз алғысын жеткізді. Анықталғандай, ол анасын көптеген жыл бойы таба алмай жүрген.
– Мен тіпті адамдарды іздеумен айналысатын телебағдарламаға да жүгіндім, бірақ, ешқандай нәтиже болмады. Ал Бақытжан Сарманов менің туыстарымды тауып берді. Шетел азаматы ретінде мен Қазақстан полициясының зейінділігі мен ұқыптылығына таңғалдым, - деді ресейлік әйел.
Қызымен қауышқан 78 жастағы қарт ана көз жасын тыя алмай, тәртіп сақшыларына разылық танытты.
– Бұл офицер менің оқиғама түсіністікпен қарап, шынайы жанашырлық танытты. Ол өз қызметтік борышын жедел әрі адал орындады. Осындай қызметкер үшін алғыс білдіремін және сіздерге осындай үлгілі полицейлер көп болсын деп тілеймін, - дейді қария.