«Пәтер, анасы екеуінің еміне қаражат, инвестиция»: әйгілі бетперделі жігіт 4 дүркін әлем чемпионына көмектесті (ВИДЕО)

SMARTNEWS.KZ басылымының хабарлауынша, әлеуметтік желіде қайырымды ісімен танылған маскадағы жігіт армрестлингтен төрт дүркін әлем чемпионы атанған Никитаға анасы екеуінің еміне және оңалту орталығын ашу үшін қаражат беріп, одан бөлек баспана сыйлады.

«Менің атым Никита, мен 33 жастамын. Қазіргі уақытта бірінші топтағы мүгедекпін. Жалдамалы үйде анаммен бірге тұрамын. Анамның көру қабілеті нашар. Оң көзі 100% көрмейді, сол жақ көзі 30% ғана көреді.

Армрестлингтен төрт дүркін әлем чемпионымын. Төрт жылдан бері елімнің намысын қорғап келемін. Міне, мен осыдан өзімді толығымен таптым. Өзімді осы іске арнадым. Еліміздің туын халықаралық аренада желбіреткенімді мақтан тұтамын.

Мен реабилитолог болып жұмыс істеймін. Мен мүмкіндігі шектеулі балалармен жұмыс істеймін. Мен үшін бұл – өмірдің мәні», – дейді Никита.

Ол өзінің армандары туралы айта кетті.

«Алдымен анама көмектесемін. Өзімнің оңалту орталығын ашқым келеді. Өзім секілді адамдармен, балалармен жұмыс жасағым келеді.

Мен көз жасымды көрсетпеуге тырысамын. Тіпті мені танитындардың бәрі мен үшін қанша қиын болса да мен жасымды ешқашан көрсетпейтінімді біледі. Жаратушы өте алмайтын сынақ бермейді», – дейді Никита.

«Человек в маске» жігіттің қайтпас қайсарлығы мен ерік-жігеріне тәнті екенін жеткізіп, Никитаға пәтердің кілті, анасы екеуінің еміне қаражат пен оңалту орталығын ашуға қажетті ақшаны ұсынды. Мұны көрген чемпион еріксіз жылап жіберді.

«Алла Тағалаға шүкіршілік етемін, бұл көмек лайықты адамға тиіп жатыр. Бұл қаражатқа анаңызбен бірге емделіп, жеке оңалту орталығын ашасыз, сонымен қатар пәтер иесі атандыңыз», – дейді бетперделі жігіт.