RUS
SMARTNEWS.KZ басылымының хабарлауынша, белгілі жазушы, драматург, Қазақстанның еңбек сіңірген қайраткері, Мемлекеттік сыйлықтың лауреаты Әкім Тарази 89 жасында өмірден өтті. Қаралы хабарды Қазақстан Жазушылар одағы растады.
Әкім Тарази (шын есімі — Әкім Ұртайұлы Әшімов) — қазақ әдебиетінің көрнекті өкілдерінің бірі, терең философиялық мәні бар прозалары мен драмалық шығармалары арқылы танылған қаламгер. Ол қазақ әдебиетінде адам жанының күйін, рухани ізденістерді, әлеуметтік өзгерістер мен тарихи кезеңдерді ерекше шеберлікпен сипаттай білген жазушы ретінде бағаланды.
1956 жылдан еңбек жолын бастаған. Жамбыл облысының Шу ауданы мұғалім (1956-58), "Ара" журналында фельетонист (1958-59), "Қазақстан пионері" газетінде жауапты хатшы (1962- 70), "Қазақфильм" киностуциясында сценарийлік редакциялық алқа мүшесі, бас редактор, 1970-71 "Литературная газетаның" Қазақстан бойынша тілшісі, 1971-80 жылдары Қазақстан Кинематографиялық одағы басқармасының 1-хатшысы болды. 1986- 91 жылдары Қазақстан Жазушылар одағының хатшысы, 1991-93 жылдары Қазақстан Ресупбликасы Мәдениет министрлігінің кеңесшісі, 1993-95 жылдары "Қаржы-қаражат" журналының бас редакторы қызметтерін атқарды. 1995 жылдан Т.Жүргенов атындағы өнер академиясының доценті.
Мәдениет және өнер саласына сіңірген еңбегі үшін көптеген марапаттарға ие болған Әкім Тарази ел жадында терең ойлы жазушы, ұлт руханиятының жанашыры ретінде сақталары сөзсіз.
Марқұмның туған-туыстарына, жақындары мен әріптестеріне қайғыра көңіл айтамыз.