RUS
SMARTNEWS.KZ басылымының хабарлауынша, Astana Hub резиденті – отандық жасанды интеллект негізіндегі Cybernet AI $350 000 астам көлемде гранттық қолдауға ие болып, Microsoft for Startups халықаралық бағдарламасының қатысушысы атанды.
«Біз Alchemist Accelerator аясында Microsoft for Startups бағдарламасына қатысуға шақырту алдық. Бұл серіктестік дамуға ықпал ететін гранттарға, сондай-ақ Microsoft ұсынған технологиялық ресурстар мен сараптамалық қолдауға жол ашты. Мұның барлығы өнімдерімізді жедел әзірлеп, корпоративтік клиенттердің талаптарына сай етіп, олардың қауіпсіздігі мен тиімділігін арттыруға мүмкіндік береді», – деді Иван Белохвостиков, Cybernet AI негізін тең қалаушы.
Бүгінде Cybernet AI Қазақстан, Өзбекстан, Қырғызстан, Египет пен АҚШ-та жұмыс істейді, сондай-ақ Ұлыбритания, Түркия, Еуропалық Одақ елдері мен Мексикада пилоттық жобаларды жүзеге асыруда. Стартаптың шешімдері 12 тілді, соның ішінде қазақ, өзбек, орыс, ағылшын, араб және испан тілдерін біледі.
Microsoft for Startups бағдарламасы аясында стартаптарға Azure бұлтты платформасы мен басқа да маңызды құралдар ұсынылады. Қатысушылар техникалық сарапшылардың сүйемелдеуімен жұмыс істейді, саладағы жетекші менторлардан кеңес алады, сондай-ақ халықаралық серіктестік желі мен инвесторларға шығу мүмкіндігіне ие болады. Бағдарлама қарқынды оқыту, өнім әзірлеуді жеделдету, нарыққа шығу стратегияларын құру және B2B шешімдерді жаһандық деңгейде ілгерілетуге бағытталған.
Cybernet AI-дың осы бағдарламаға қатысуы қазақстандық стартаптардың технологиялық бәсекеге қабілеттілігі мен халықаралық деңгейде жұмыс істеу мүмкіндігінің артып келе жатқанын көрсетеді.
Сондай-ақ Орталық Азияда жасалып жатқан инновацияларға жаһандық корпорациялардың қызығушылығының артқанын білдіріп, өңірлік компанияларға жаңа нарықтар мен серіктестік мүмкіндіктерінің есігін ашады.