RUS
SMARTNEWS.KZ басылымының хабарлауынша, Ақтөбеде өзін халық емшісі ретінде таныстырған азаматша ем іздеп келген 90 адамға түрлі сылтаумен банктен несие алдыртқан. Алаяқтық әрекеттері үшін оған қатысты қозғалған қылмыстық іс сотқа жолданды.
Тұрғындардың айтуынша, емші әрбір адамға әртүрлі себеп айтып, сенімдеріне кірген. Бірде қызының еміне ақша қажет екенін айтса, енді бірде мешіт құрылысына немесе бизнесіне қаражат керек деп алдап, банктерден несие алуға көндірген. Алайда кейін ол несиелерді төлемей қойған. Нәтижесінде көптеген адам қаржылық қиындыққа тап болып, полицияға арызданған.
Мемлекеттік айыптаушы Гүлназым Әлиеваның айтуынша, күдікті саналы түрде, пайдакүнемдік мақсатта алаяқтық әрекеттерге барған.
«Өзіне ем алуға келген адамдардың сеніміне кіріп, әртүрлі банктерден несие алдыртып, ақшаны екі ай ішінде қайтарамын деп уәде берген. Бұл уәдесін орындамай, алаяқтық жолмен азаматтардың мүлкін иемденіп, ауыр дәрежелі қылмыс жасаған», – деді прокурор.
Іс материалдары бойынша, жалпы шығын көлемі 406 миллион теңгеден асқан. Зардап шеккендердің бірі – Анар Ержанова есімді азаматша. Ол емшінің сөзіне сеніп, 5 миллион теңгеге несие рәсімдеген.
«1 миллионды Kaspi банктен, қалғанын Еуразия банкінен алдым. Kaspi-ді әрең жауып болдым. Қазір Еуразияға 3 миллион қарызым қалды. Менің жалғыз талабым – мойнымдағы кредитті жапсын», – дейді ол.
Қазір бұл іс Ақтөбедегі сотта қаралып жатыр. Емші өз кінәсін мойындамаған.