RUS
SMARTNEWS.KZ басылымының хабарлауынша, Ақтау полицейлері қала тұрғындарын қоғамдық тәртіп ережелерін сақтауға шақырып, киім мен төсек-жаймаларды үй ішінде кептіруге кеңес берді.
Оқиға 32Б шағын ауданында болған. Мұнда бір тұрғын өз үйінің алдында жуылған кірлерін далаға жайып қойған. Бұл әрекетті учаскелік инспекторлар қаланы абаттандыру ережелерін бұзу деп танып, әкімшілік хаттама толтырды.
Тұрғын ҚР Әкімшілік құқықбұзушылық кодексінің 505-бабы («Қалалар мен елді мекендердің аумақтарын абаттандыру ережелерін бұзу, инфрақұрылым нысандарын бұзу, көгалдарды жою және бүлдіру») бойынша жауапқа тартылды. Бұл бап бойынша:
— Жеке тұлғаларға — 20 айлық есептік көрсеткіш (78 640 теңге),
— Шағын кәсіпкерлік немесе коммерциялық емес ұйымдарға — 30 АЕК (117 960 теңге),
— Орта кәсіпкерлік субъектілеріне — 40 АЕК (157 280 теңге),
— Ірі кәсіпкерлерге — 100 АЕК (393 200 теңге) көлемінде айыппұл салу немесе ескерту қарастырылған.
Айта кетейік, Ақтауда көшеге жайылған кір мәселесі 2022 жылы да қызу талқыға түскен еді. Қала тұрғындары арасында «шығыс самалында желбіреген ішкиім» тақырыбы біраз уақыт әлеуметтік желілерді дүрліктірген болатын.