RUS
SMARTNEWS.KZ басылымының хабарлауынша, Ақтаудың 26-шағынауданындағы №19 үйдің артында болған қақтығыс қайғылы жағдаймен аяқталды — бір ер адам көз жұмды. Бұл оқиға туралы Маңғыстау облыстық полиция департаменті пікір білдірді.
Тұрғындардың айтуынша, қайғылы оқиға 28 сәуірде болған. Жанжал соңы төбелеске ұласып, бір ер адамның өмірі қиылды. Әлеуметтік желілерде тараған видеодан кейін оқиға орнына тәртіп сақшылары жеткен.
Lada.kz тілшісі түсініктеме алу үшін Маңғыстау облыстық полиция департаментіне жүгінді. Ведомство мәліметінше, адам өліміне күдікті ұсталып, уақытша ұстау изоляторына қамалған. Аталған факті бойынша қылмыстық іс қозғалды. Тергеу амалдары жүргізіліп жатыр, өзге ақпарат тергеу мүддесіне байланысты жарияланбайды.
Айта кетейік, 26-шағынаудан тұрғындары №19 үйдің артқы аумағында көктем басталғалы бері үй-күйсіз жүргендер мен ішімдікке салынған адамдар жиі жиналатынын алға тартты. Олардың сөзінше, жақын маңдағы дүкеннен алкоголь сатып алған бұл топ кейінірек сол аумақта шу шығарып, бас қосатын болған.
Жергілікті тұрғындар бұл аймақты қауіпті деп санап, биліктен тиісті шара қабылдап, тәртіп орнатуды талап етуде.