Ардақ Назаров той үшін несие алуға тыйым салып, ажырасатындарға жарна енгізуді ұсынды

SMARTNEWS.KZ басылымының хабарлауынша, Мәжіліс депутаты Ардақ Назаров Үкімет басшысы Олжас Бектеновке жолдаған депутаттық сауалында отбасылардың жаппай ыдырауына алаңдаушылық білдіріп, нақты ұсыныстарын ұсынды.

Назаров не дейді?

Оның айтуынша, соңғы жылдары ажырасу деңгейінің артуы ұлттық қауіпсіздік пен тұрақтылыққа тікелей қауіп төндіріп отыр. Мәселен, 2023 жылы 120,8 мың неке тіркелсе, соның үштен бірі — 40,2 мыңы ажырасумен аяқталған. Бүгінде елде 400 мың әйел мен 60 мың ер адам жалғызбасты ата-ана болып отыр.

Ұсынылған шаралар:

• Ажырасуға кедергі ретінде мемлекеттік баж енгізу. Яғни, өтініш берер алдында қомақты сома төлеу міндеттелсін.

• Ажырасқандарға табыс салығын кезең-кезеңімен арттыру.

• Бітімгершілік кеңестерін жандандыру. Сотқа жетпей тұрып, жұптардың мәселесін имамдар, ақсақалдар мен әйелдер кеңестері қарасын.

• "Жас отбасы" ұлттық бағдарламасы. Жас отбасыларға үй, балабақша жолдамасы, салық жеңілдігі, жәрдемақы қарастырылуы қажет.

• Несиесіз той – берекелі отбасы. Қаржылық сауаттылықты арттырып, қарапайым тойға үндейтін ұлттық науқан ұсынылды.

— Ажырасу – жеке мәселе емес. Бұл – ұрпақтың, мемлекеттің мәселесі. Сондықтан бұл мәселеге стратегиялық деңгейде қарауымыз керек, — деді Назаров.

Депутат Үкімет пен Парламенттен бұл ұсыныстарды кешіктірмей іске асыруды сұрады.