RUS
SMARTNEWS.KZ басылымының хабарлауынша, Атырау облысында Каспий теңізі жағалауындағы қамыс алқаптары екі күннен бері жанып жатыр. Бұл туралы облыстық Төтенше жағдайлар департаментінің баспасөз қызметі мәлімдеді.
«2025 жылғы 1 мамыр күні сағат 18:30 шамасында Атырау қаласынан 40 шақырым жердегі Тасқала ауылы маңында қамыстың төрт ошақтан жануы тіркелді. Оқиға орнына дереу ТЖД күштері мен техникалары жіберілді. Қазіргі уақытта өртті сөндіру жұмыстары жалғасуда», – делінген хабарламада.
Өртті сөндіруге барлығы 101 адам мен 21 техника жұмылдырылған: оның ішінде Атырау облысы ТЖД-дан 76 қызметкер мен 12 техника, сондай-ақ «Ақжайық» мемлекеттік табиғи резерваты тарапынан 25 адам мен 9 техника тартылған.
Қамыстың қалың әрі биік болуы (2–2,5 м), батпақты жерлер және күшті жел өрт сөндіруді қиындатуда.
«Сағат 18:30 жағдай бойынша шамамен 50 гектар аумақтағы өрт сөндірілді. Алдын ала мәлімет бойынша, 400 гектар қамыс өздігінен өшкен. Жалпы өрт аумағы нақтылануда. Қалған ошақтарды сөндіру жұмыстары жалғасып жатыр. Тілсіз жаудың елді мекендерге тарау қаупі жоқ», – делінген ресми ақпаратта.