RUS
SMARTNEWS.KZ басылымының хабарлауынша, Threads әлеуметтік желісінің қолданушысы InDrive қосымшасы арқылы жасалған сапар кезінде болған мазасыз жағдай туралы айтып, жазба жариялады. Оның айтуынша, жүргізушінің әрекеті құрбысына қауіпсіздігі үшін қатты алаңдауға себеп болған. Бұл туралы Liter.kz жазды.
Оқиға көлікке тапсырыс берген сәтте басталған. Қыздың айтуынша, тапсырыс расталғаннан кейін жүргізуші қоңырау шалып, күтпеген сұрақ қойған:
“Жүргізуші қоңырау шалып, біртүрлі сұрақ қойды: ‘Жалғызсың ба?’ деп бірнеше рет нақтылады”.
Көлік келгенде жағдай тіпті ушыға түскен. Машинада жүргізушіден бөлек тағы бір белгісіз ер адам отырған. Ол туралы қосымшада ешқандай мәлімет болмаған. Бұл – такси қызметінің ең негізгі қауіпсіздік стандарттарын өрескел бұзу еді. Қыз өзін қауіпте сезініп, көлікке отырмай қойған.
Threads желісінен скриншот
Қыздың айтуынша, оның бас тартуына жүргізуші “бейәдеп” жауап беріп, қазақша: “Айттым ғой саған” деп айтқан. Бұл сөз жолаушының күдігін одан сайын күшейткен.
“Жүргізушіге қатысты шара қолдануды сұраймын, оның әрекеті қауіпсіздік стандарттарына қайшы және үлкен алаңдаушылық тудырады. Сонымен қатар, неге көлікте бөгде адамдар болғанын анықтауларыңызды сұраймын. Мұндай нәрсе қалайша сервис аясында мүмкін болып отыр? Бұдан бөлек, келген жүргізуші қосымшадағы профильдегі адамға мүлде ұқсамайды. Бұл – жүргізушілерді тексеру мен платформаға кіруге рұқсат беру жүйесіне қатысты үлкен сұрақтар туындатады. Келуі тиіс болған Cobalt орнына мүлде басқа Changan көлігі келді”, – деп жазды қолданушы шағымында.
Оқиға әлеуметтік желіде тез таралып, адамдардың ашуын туғызып, жолаушылар тасымалы саласында, әсіресе әйелдердің қауіпсіздігіне қатысты талаптар күшейе түсті:
“Яндекс қолданған дұрыс, индрайвер тым қауіпті платформа”.
“Атыңызды ауыстырыңыз, менде баламның аты тұр. Әйел отырғанына таңқалмады да. Таксиге кіргенде біреумен телефон арқылы сөйлесіп, өзіңіз көрсеткен атты атап, мысалы – ‘Иә, Мәлік, такси шақырғаныңа рахмет, бәрі жақсы’ деген сияқты айтыңыз. Болмаса – ‘келген соң хабарласам, бәрі қалай өтті – айтам’ деп қойыңыз. Сол кезде бақылап отыратындарын білдіріңіз”.
“Сұмдық қой бұл, ойларында не болғаны онсыз да түсінікті”.
Liter.kz редакциясы InDrive компаниясының баспасөз қызметіне ресми сауал жолдады.
“Біз бұл оқиғадан хабардармыз және ішкі тексеріс жүргізіп жатырмыз. Қазірдің өзінде жолаушымен байланысқа шықтық, ол кісіге кері байланысы үшін алғыс айтып, мұндай әрекеттің платформа ережелеріне қайшы екенін хабарладық. Бұл оқиға біз үшін өте маңызды. Қауіпсіздік – біз үшін басты басымдық. Тексеру кезінде жүргізуші уақытша бұғатталды. Егер жүргізуші тарапынан ереже бұзушылық анықталса, аккаунт толықтай жабылып, платформадағы жұмысы тоқтатылады. Ресми сұраныс болған жағдайда құқық қорғау органдарына толық көмек беруге дайынбыз”, – деп мәлімдеді компания өкілдері.
Сондай-ақ, олар сапар алдында қауіпсіздікке күмән туындаса, қолданушы сапарды бас тартып, пікір қалдыра алатынын еске салды.
Жолаушы сапар деректерін жақындарына бөлісе алады немесе SOS батырмасы арқылы төтенше қызметтерді шақыру мүмкіндігі бар.
“Қолданушылар шағымды қосымша арқылы бірнеше жолмен жолдай алады. Мысалы, сапар барысында “Қалқан” батырмасын басу арқылы немесе бүйірлік мәзірдегі “Қауіпсіздік” бөлімі арқылы. Сапар соңында қолданушы төмен баға қойып, түсініктеме жаза алады – ол да қаралады”, – деп қосты InDrive.