RUS
SMARTNEWS.KZ басылымының хабарлауынша, Астанада жаңа №58 автобус бағыты іске қосылды. Бұл бағыт сол және оң жағалауды жалғайды. Бағыт сызбасы қала тұрғындары үшін ыңғайлы және қажет деп танылды. Ал оның авторы – бар болғаны 8 жастағы мектеп оқушысы. Бұл туралы мектеп әкімшілігі мәлімдеді.
Үшінші сыныпта оқитын Әбілмансұр Айтқожа өз отбасы тарихынан шабыт алып, елорда көлік инфрақұрылымының дамуына үлес қосты.
"Жас астаналық бала кішкентайынан картаға қызыға бастады. Алдымен физикалық әлем картасына, кейін туған қаласының сызбасына назар аударды. Қаланы аралап, картаны зерттей келе, Әбілмансұр кейбір аудандар, соның ішінде Күмісбеков көшесі, қоғамдық көлікке қолжетімді емес екенін байқаған", – делінген ресми хабарламада.
Әбілмансұр қозғалыс бағытына өзгерістер енгізіп, негізгі көшелер мен аялдамаларды нақтылап көрсеткен. Оның ұсынысы көлік басқармасына жолданып, көп ұзамай жүзеге асырылды – қазіргі таңда елорда көшелерімен №58 автобус қатынайды.
Сурет: Instagram.com/@2_school_astana
Картография мен кеңістікті болжауға деген қабілеті Әбілмансұрға атасынан – Айтқожа Қасқұлақовтан дарыған болуы мүмкін. Тура 39 жыл бұрын газетте оның жер орналастыру жобасы жайлы мақала жарық көрген. Жоба сәтті жүзеге асып, отбасы бұл материалды бүгінге дейін сақтап жүр.
"Атам маңызды жобамен айналысқанын, ол туралы газет жазғанын естігенде, мен де қалам үшін пайдалы іс жасағым келді", – дейді Әбілмансұр.