RUS
SMARTNEWS.KZ басылымының хабарлауынша, Қазақстандағы Назарбаев зияткерлік мектептерінде (НЗМ) оқу енді бұрынғыдан арзандау болмақ. Бұл туралы Оқу-ағарту министрлігі хабарлады. Министр Ғани Бейсембаев 2025 жылғы 22 сәуірде ҚР Президентінің «Өркен» білім беру грантын тағайындау және оның мөлшерін белгілеу қағидаларына өзгеріс енгізу туралы бұйрыққа қол қойған.
Министрлік таратқан мәліметке сәйкес, жаңа өзгеріс аясында бір оқушыға арналған жылдық грант сомасы азайтылды. Бұл — мемлекет тарапынан бөлінетін қаражат мөлшері қайта есептеліп, нақты қажеттілікке бейімделгенін көрсетеді.
Жаңа мөлшер бойынша «Өркен» гранты мынадай сомада белгіленіп отыр:
– Жатақханасыз жылдық оқу құны – 2 190 080 теңге;
– Жатақханамен бірге – 3 053 940 теңге.
Ал бұрынғы ереже бойынша бұл сомалар тиісінше 2 349 191 теңге және 3 247 305 теңге болатын.
Яғни, шамамен 160 мың теңгеге жуық қысқартылған. Бұл аз емес. Әсіресе елдегі инфляция жағдайында мемлекет шығынын оңтайландыруға бағытталған нақты шешім ретінде бағаланып отыр.
Білім беру саласындағы бұл өзгеріс дарынды балаларға арналған мемлекеттік қолдаудың жалғасып жатқанын көрсеткенімен, кей сарапшылар мұндай қысқартудың мектептердің ішкі ресурсына немесе қосымша қызметтеріне әсері болуы мүмкін екенін де жоққа шығармайды.
Айта кетейік, «Өркен» гранты НЗМ-де оқитын барлық оқушыға автоматты түрде тағайындалады және оқу ақысын толықтай жабады. Бұл — елдегі ең беделді орта білім беру жүйелерінің бірі саналатын Назарбаев зияткерлік мектептеріндегі білімге тең қолжетімділікті қамтамасыз ететін басты құрал.