RUS
SMARTNEWS.KZ басылымының хабарлауынша, Қазақстан Қарулы күштерінің әскери қызметшілері АҚШ-тың Аризона штатындағы Кемп Навахо базасында өтіп жатқан жыл сайынғы Best Warrior байқауына қатысып жатыр. Бұл туралы Қорғаныс министрлігі хабарлады.
Қазақстан намысын 54835 әскери бөлімінің 3-сыныпты сержанты Аслан Дархан мен 18404 әскери бөлімінің 3-сыныпты гвардия сержанты Рауан Тоқтарбеков қорғап жатыр. Екеуі де – кәсіби шеберлігімен танылып үлгерген сарбаздар.
Биылғы дода 18 мамырға дейін жалғасады. Жарысқа АҚШ-тың жеті штатынан және Фиджи, Гуам, Тонга, Филиппин елдерінен келген үздік әскери қызметкерлер қатысып жатыр. Олар армиялық фитнестен бастап, тактикалық медицина, түнгі күзет, жергілікті жерді бағалау, картамен жұмыс, ату жаттығулары мен 22 шақырымдық әскери маршқа дейін қамтитын 10 негізгі кезең бойынша сайысуда.
Қазақстандық сарбаздар АҚШ армиясының қару-жарағын және жабдықтарын қолдана отырып, барлық жаттығу мен нормативтерді жоғары деңгейде орындап жатыр.
Аслан Дархан 800 метрге жүгіруде 2 минут 5 секунд нәтижемен Аризона Ұлттық гвардиясы тарихындағы рекордты жаңартты. Бұл – байқау тарихында болмаған нәтиже.