RUS
SMARTNEWS.KZ басылымының хабарлауынша, Павлодар облысындағы №45 түзету мекемесінде жазасын өтеушілерге тыйым салынған заттарды заңсыз жеткізу әрекеті әшкереленді.
«Шығыс» өңірлік қолбасшылығының мәліметінше, сәлемдемелер мен бандерольдерді тексеру кезінде 6679 әскери бөлімінің сарбаздары мұқият жасырылған ұялы телефон мен бірнеше SIM-картаны тауып алған. Ұялы құрылғылар шоколадтың орамына оралған.
— Ұлттық ұлан қызметкерлерінің қырағылығының арқасында колония аумағына байланыс құралдарының өтіп кетуіне жол берілмеді. Бұл мекеме қауіпсіздігіне елеулі қатер төндіруі мүмкін еді. Аталған жайтқа байланысты қызметтік тексеру басталды. Жіберуші мен құқықбұзушылыққа қатысы бар адамдар анықталып жатыр, — деді баспасөз қызметі.
ҚАЖ мамандарының айтуынша, ұялы телефон, SIM-карта және басқа да тыйым салынған заттарды колонияға кіргізу — заң бұзушылық. Мұндай әрекет әкімшілік немесе қылмыстық жауапкершілікке әкеп соғуы мүмкін.