RUS
SMARTNEWS.KZ басылымының хабарлауынша, Ақтөбеде «Жол қозғалысының жас инспекторы» жарысы кезінде 13 жастағы оқушы қыз мұрнын сындырып алды. Қазір ол ауруханада ем қабылдап жатыр. Анасы болған жағдайға жарыс ұйымдастырушыларын және облыстық полиция департаментін кінәлайды.
Оқиға 16 мамыр күні облыс орталығындағы Тұңғыш Президент атындағы саябақта өткен жарыс кезінде болған. Іс-шараны Ақтөбе облыстық ПД ұйымдастырған. Зардап шеккен оқушы — Қандыағаш қаласындағы №4 мектептің 7-сынып оқушысы Махаббат Жалғас.
Оқушының анасы Айнұр Шәріпованың айтуынша, қызы велосипедпен жарысып келе жатып құлап түскен. Құлау сәті мектеппен бірге барған мобилографтың камерасына түсіп қалған.
«Балаға алғашқы медициналық көмек көрсетілмеді. Қызымның жағдайы нашарлаған соң, сол жерге үлкен қызым 103-ке хабарласып, жедел жәрдем шақырды. Ауруханада мұрнын рентгенге түсіріп, кейін қайта саябаққа бардық. Жарыстан соң автобуспен балалармен бірге үйге қайтты. Жол бойы қызым ұйықтап келді. Үйге келген соң лоқсып, басы айналып, мазасыздана бастады. Кейін мұрнының сол жақ сүйегі сынғаны анықталды», – дейді ол.
Анасы жарыс ұйымдастырушылары қауіпсіздік талаптарын сақтамағанын, жарақат алған балаға бірден көмек көрсетілмегенін айтады.
Ал облыстық полиция департаменті бұл айыптаулармен келіспейді. Олардың айтуынша, жарыс кезінде медициналық көмек көрсету тобы тұрақты жұмыс істеген.
«Шара барысында жедел жәрдем қызметінің бригадасы оқиға орнында болды. Бала құлап, жарақат алған сәтте алғашқы көмек көрсетілді», – делінген полиция таратқан ресми мәлімдемеде.
Ақтөбе облыстық денсаулық сақтау басқармасы да оқушының қазіргі жағдайын түсіндірді:
«2012 жылы туған қыз 16 мамырда Мұғалжар аудандық ауруханасына түсті. Хирургия бөлімінде ем алып жатыр. Жағдайы – қанағаттанарлық», – деді ведомство өкілдері.