RUS
SMARTNEWS.KZ басылымының хабарлауынша, 21 мамырда өткен сот отырысында қатысушылар түскі үзіліске шығып жатқанда әлдекімдердің күмәнді диалогы эфирден естіліп қалған. Осыған байланысты сот жеке қаулы шығарды.
"2025 жылғы 21 мамырда осы іс бойынша "басты сот талқылауының үзілісі кезінде айтылған сөздердің аудиожазбасы" деп желіде таралу фактісіне Алматы облысының прокуроры назарын аударсын. Күзетпен ұстауда отырған сотталушылар қаулының көшірмесін алған күннен бастап 15 тәулік ішінде, ал сот мәжілісіне қатысқандар қаулы жария етілген күннен бастап белгіленген мерзім ішінде Алматы облысының Қылмыстық істер жөніндегі мамандандырылған ауданаралық соты арқылы Алматы облысы сотының Қылмыстық істер жөніндегі аппеляциялық алқасына шағым немесе прокурор өтінішхатын түсіруге құқылы", - деп қаулы етті сот.
Кейін сотқа төрағалық етуші судья Ержан Жанұзақов қаулыны түсіндірді.
"Кеше желіде сот процесіне қатысы бар адамдардың екіұшты сипаттағы әңгімесін қамтитын бейнежазба таратылды, осыған орай сот жеке қаулы шығаруды қажет деп тапты.
Прокурор бейнежазбаның шынайылығын, диалогқа қатысушылардың кім екенін, олардың сөзінің мазмұнын анықтап, заңға сәйкес тиісті шара қабылдауға тиіс", - деді судья.
Сонымен қатар ол Қазақстан Республикасының Конституциясына сәйкес, іс бойынша шешімді тек сот қабылдайтынын еске салып, кез келген жорамал мен арандатушылық әрекетке жол берілмейтінін айтты.
Айта кетейік, бұл жерде сот процесіне қатысушылар үзіліске шығып бара жатқанда айтылған диалог меңзелген.
"Көзімнен жас шығып кете жаздады, дұрыс сөйледім бе?" - дейді бір ер адам.
"Саған көп сұрақ қоймайды, уайымдама, сөйлесіп қойғанмын", - деп жауап берген оған екінші адам.