«Мені кемсітті»: Соңғы қоңырауда жас түлек мектеп директоры туралы шындықты айтып кетті

SMARTNEWS.KZ басылымының хабарлауынша, Ресей Федерациясының құрамындағы Чувашияда мектеп түлегі соңғы қоңырауда директорды буллинг үшін айыптады.

Чувашияның Янтиково ауданына қарасты Ян-Норваш ауылындағы мектепте соңғы қоңырау ел күтпеген жанжалға ұласты. Түлек салтанатты жиында директор Раиса Илларионованы көпшілік алдында буллинг пен қорлау әрекеттері үшін айыптады.

Оқушы қыздың айтуынша, директор оны "тәрбиесіз", "ақыл-есі кем" деп атаған, басқа оқушылар мен ересектердің көзінше жүйелі түрде кемсітіп, жала жапқан.

"Мен бұл сөздерді тек өзім үшін емес, басқа оқушылар үшін де айтып тұрмын. Ол мені ғана емес, басқаларды да қорлауы мүмкін", – деді түлек.

Қыздың сөзі залда отырғандарды елең еткізді. Мектеп әкімшілігі микрофонды өшірмек болғанымен, ата-аналар мен қонақтар қол шапалақтап, сөзін жалғастыруға мүмкіндік берді.

Оқиға бейнежазбаға түсіп, желіде кеңінен тарады. Қазір Чувашия прокуратурасы бұл факті бойынша тексеріс бастап кетті. Прокуратура директор тарапынан оқушыларға қатысты қысым болған-болмағанын анықтамақ.

Егер айтылғандар расталса, жауаптылар заң жүзінде жазаланады, деп хабарлады өңірлік прокуратураның баспасөз қызметі.