RUS
SMARTNEWS.KZ басылымының хабарлауынша, Ақтауда лицензиясыз Instagram парақшасында жүлде ойнатқан ер адамға сот айыппұл салды.
Сот материалдарына сәйкес, 2025 жылғы 16 қаңтарда ол «Бизнесті нөлден бастау» атты курсын сата бастаған. Кейін қатысушылардың арасынан жеңімпаздарға ақша, смартфон, тіпті автокөлік сыйлайтынын уәде етеді. Алайда заңға сәйкес, мұндай әрекеттер лотерея болып есептеледі және оларды тек арнайы лицензиясы бар ресми операторлар ғана өткізе алады.
Сот ер адамның кінәсін дәлелденген деп тапты. Айғақ ретінде хаттама, Instagram-дағы скриншоттар және басқа да материалдар ұсынылған.
Нәтижесінде блогерге 825 720 теңге (100 АЕК) көлемінде айыппұл салынды. Бұл – Әкімшілік құқық бұзушылық туралы кодекстің 445-1-бабы бойынша жеке тұлғаларға арналған ең төменгі жаза. Жаза мөлшерін жеңілдететін жағдай – ер адамның заңды алғаш рет бұзғаны болды.