RUS
SMARTNEWS.KZ басылымының хабарлауынша, Ташкент облыстық ІІБ мен Мемлекеттік қауіпсіздік қызметі «Қауіпсіз және салауатты ел» жедел алдын алу іс-шарасы аясында жас қызды Ресейге жыныстық мақсатта алып кету әрекетінің жолын кесті.
53 жастағы Ангрен қаласының тұрғыны ұсталды. Тергеу мәліметінше, ол 22 жастағы танысын алдап, Санкт-Петербургке жоғары жалақы төлейтін жұмыс бар деп сендіріп, жолға үгіттеген. Алайда шын мәнінде, қызды жезөкшелікпен айналысуға тарту көзделген.
Күдікті Ташкент халықаралық әуежайында, елден шығарып бара жатқан сәтте қолға түсті.
Тергеу барысында белгілі болғандай, ұшу билеттері мен барлық шығынды Санкт-Петербург қаласында тұратын белгісіз әйел өтеген. Оның есесіне, қыз жыныстық қызмет көрсетіп, ал делдал әйел "жеткізгені үшін" ақы алуы тиіс болған.
Күдіктіге қатысты Өзбекстан Республикасы Қылмыстық кодексінің 135-бабы 2-бөлігі "а, з" тармақтары бойынша іс қозғалды. Бұл – екі не одан да көп адамға қатысты жасалған, жалған құжаттар пайдаланылған және жәбірленушінің жеке басын куәландыратын құжаттарды тартып алу, жасыру немесе жою арқылы жасалған адам саудасы бабы.
Қазіргі уақытта тергеу жалғасып жатыр, қылмыстық топтың өзге мүшелері мен адам саудасы арналарын анықтау жұмыстары жүргізілуде.